Print this page

KMTB Husu Governu Rekoiñese Sakrifisiu Joven 82 iha Masakre Tumin

By September 09, 2021 971
Família Vítima husi Masakre Bobo Ufe Tumin, hala'o hela serimónia rutuál hodi sunu lilin no kari ai-funan ba rezidensia ne'ebé uluk okupa husi joven 82 , iha Bidau Lisidere, kinta (09/09). Família Vítima husi Masakre Bobo Ufe Tumin, hala'o hela serimónia rutuál hodi sunu lilin no kari ai-funan ba rezidensia ne'ebé uluk okupa husi joven 82 , iha Bidau Lisidere, kinta (09/09). Foto Tempo Timor

Tempotimor (Dili)-Komité Masakre Bobo-Ufe Tumin (KMTB) husu Governu liuhusi Ministériu Asuntu Kombatente Libertasaun Nasionál (MAKLN) atu rekoiñese sakrifisiu joven hamutuk na'in-82 ne'ebé hetan oho iha pasabe besik fronteira Timor-Leste no Indonézia, loron 9 fulan-setembru tinan 1999, ne'ebé koñesidu Masakre Bobo-Ufe Tumin.

"Iha akontesimentu masakre bobo-ufe ninian, ne'ebé mak rezulta ema mate iha dia 8 no 9 de setembro 1999, hamutuk ema na'in-82, mak sakrifika sira-nia an, ba ita-nia liberdade rai ida ne'e", hatete Prezidente Komité Masakre Bobo-Ufe Tumin (KMTB), Batista dos Santos Elo hafoin selebra loron Masakre Bobo Ufe Tumin ba dala-22 iha Bidau Lisidere, kinta (09/09).

Akontesimentu masakre Bobo Ufe Tumin ne'e, iha loron 8 no 9 fulan-setembru 1999, Momentu ne'ebé balun mate soe hela sira-nia oan ne'ebe mak sei ki'ik oan, balun sei bebé, ohin loron sira-nia oan bele to'o tinan 22.

Maibé sira-nia restu mortais ne'e, iha tempu ne'eba bainhira UNTAET tama ejiste iha tinan 1999 hodi troka UN, konsege ké sai saudozu sira-nia restu mortais, no balun la konsege hetan tanba mota lori no rai halai taka tiha ruin, balun hetan isin lolon mais la kompletu.

Durante ne'e, vítima nia oan sira hamutuk hari'i ona komité masakre Tumin, ne'ebé lidera husi Batista dos Santos Elo, ho esperansa ba futuru hakarak husu nafatin ba estadu atu rekoiñese sira-nia sakrifisiu.

"Tanba sira-nia mate, parte ba liberdade. Estadu tenke rekoiñese sira tinan 22 ona, tenke haree tratamentu ba oan ki'ak sira, karik iha oportunidade ruma bele pasa ba sira hodi nune'e sira mós bele inklina-an iha oportunidade ida ne'e", dehan nia.

Maske, komemoerasaun ba akontesimentu Masakre Tumin iha kapitál Dili, tinan 2021 ne'e labele realiza hanesan tinan sira uluk, tanba presiza kumpre protukolu Covid-19, mak Komité Masakre Bobo Ufe Tumin rejeita atu akumula ema barak hodi komemora loron importante ne'e.

Maibé, sinplesmente família mós lakohi lakon espiritu atu hanoin hikas istória martire sira, no dadauk família maun alin halibur malu hodi halo serimónia rituál iha rezidénsia Bidau Lisidere, ne'ebé joven 82 uluk hela, no tuir planu tuku 6 lorokraik sei lori ai-funan ba kari iha Tasi Ibun.

"Sentimentu ba komemeorasaun ba tinan ida ne'e, wainhira to'o iha sira-nia loron, ita sempre triste, no triste ne'ebe mak hafalun ita durante luta ba ukun rasik-an la fasíl, ema barak tenke maten, tenke sakrifika sira-nia vida , tan de'it ita-nia liberdade", hatete nia.

Enkuantu, família no vítima sira iha knua Rejiaun Administrativa Espesiál Oekussi Ambeno (RAEOA) mós selebra hela loron ne'e hodi kari ai-funan ba saudozu sira-nia rate. (*)

Rate this item
(1 Vote)
Last modified on Thursday, 09 September 2021 15:16
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items