"Kazu sira ne'ebé prosesu ona iha 95, depois kazu ne'ebé sei prosesu hela hamutuk 134, kazu ne'ebé arkivu ka rezolve liuhusi prosesu mediasaun ka liuhusi entidade seluk ne'ebé halo mediasaun hamutuk, 196, husi fulan-janeiru to'o agostu", informa Fasilitadór DNPKK, Julião Fernandes, iha Otél Delta Nova, kuarta (22/09).

Tuir dadus ne’ebé hatudu husi SEPS, kazu hirak ne'e, balu akontese dezde tinan 2020, no balu iha tinan 2021 nia laran.

"Kazu ne'e prosesu hela ne'e siknifika katak ita-nia mediadór sira sei iha prosesu aprosima hela, e seidauk serteza katak iha solusaun. Tanba ida ne'e mak kategória hanesan sei prosesu hela", esplika nia.

Tuir madatalan kona-ba sensibilizasaun jéneru husi DNPKK nian katak, tipu mediasaun konflitu sira ne’ebé mosu iha sosiedade mak hanesan, konflitu negósiu, interpesoál, konflitu rai, no konflitu kestaun família.

"Entaun, husi konflitu 4 ne'e, baibain akontese maka'as ne'e mak konflitu interpesoál. Husi konflitu interpesoál ne'e, konflitu ne'ebé liga mós ba asalata malu entre joven sira, depois akumula hothotu, tanba iha konflitu interpesoál”, afirma nia.

Tipu konflitu hirak akontese, tanba envolve direta husi feto no mane sira ne’ebé hothotu sai mós hanesam autór vítima no suspeitu, mane iha na’in-452 no feto na’in-132. (*)