"Vise Primeira Ministra no Ministra Solidariedade Sosiál no Inkluzaun no Komisária asionál ba Direitu Labarik, Dinorah Granadeiro, aprezenta ba Konsellu Ministrus, Relatóriu Periodu Dahaat kona-ba Konvensaun Direitu Labarik nian no protokolu fakultativu sira relasiona ho faan labarik, prostituisaun no pornografia infantil no envolvimentu labarik iha kontlitu armadu sira", dehan Ministru Prezidénsia Konsellu Ministru (MPKM), Fidelis Leite Magalhães, iha Palásiu Governu, kuarta (06/10).
Relatóriu ne'e abranje períodu tinan 2015 to'o tinan 2019 ba Konvensaun no husi tinan 2008 to'o 2019 ba protokolu fakultativu sira.
Relatóriu ne'e avalia fali konvensaun ne'ebé mak liu ona hahú husi tinan 2008 to'o iha tinan 2019.
"Atu rekolla dadus no informasaun husi relatóriu ne'e kona-ba implementasaun husi rekomendasaun sira Konvensaun nian, hala'o konsulta públika ne'ebé luan ho ministériu no instituisaun Estadu sira ne'ebé relevante”, hatete nia.
Hafoin finaliza esbosu dahuluk husi dokumentu ne'e, Komisaun Nasionál ba Direitu Labarik nian, rona mós opiniaun no komentáriu sira husi organizasaun sosiedade sivíl nasionál, estranjeira no Ajénsia Nasaun Unidas. (*)