“Ha'u hanoin deputadu ida ne'ebé autoriza ninia motirizada hodi halo ida ne'e, ne'e aktu ligasaun ho administrasaun nomós morál, ka étiku de uzu. Tuir loloos o la presiza taka, karreta prado ka sport ne'e ema hatene, na'in-64 nia karreta ida ne'e o atu taka halo nusa mós ema hatene katak ne'e deputadu nia karreta”, dehan nia iha kna’ar fatin Farol, sesta (08/10).

Tanba públiku tomak hatene karreta matríkula mean ne'e deputadu nian entaun kondutór sira ne'ebé lori karreta ne'e, nia la presiza taka, karik nia iha nesesidade ruma urjénsia atu uza tenke ho legalmente, mais labele halo fali atividade ilegál.

“Povu presiza hatene tanba karreta ida ne'e povu nia osan mak lori sosa, tanbasá mak o tenke falun fali plat (xapa matríkula) ida povu nian ne'e, plat mean ne'e plat povu nian, o reprezentante povu atu halo servisu ba estadu no povu”, dehan nia.

Pozisaun AJAR mós nota motorista ne'e laiha étika no menus edukasaun tanba uza karreta parlamentu nian maibé hafalu tiha plat depois uza ba asuntu partikulár.

"Karreta ne'e la'ós deputadu mak hasai osan hodi halo manutensaun, maibé ne'e kustu manutensaun ne'e mai husi kofre Estadu. Liuhusi orsamentu jerál Estadu kada tinan ne'e mak hodi manutensaun, ita-boot sira hatene pajeru nia kustu karun loos, roda, pesa sira ne'ebé mak hodi ajuda ne'e karun”, afirma nia.

Tanba ne'e, husu ba deputadu atu presiza toma atensaun ba motorizada sira, hodi nune'e labele utiliza sala patrimóniu Estadu ba interese privadu, liliu falun plat karreta nian, tanba povu triste ho atetude refere.

Tanba iha loron kuarta (06/10), maizumenus tuku 09:00 liu, oras dadeersan, mosu karreta Prado Kór muntin hala’i tuir estrada dirasaun Delta Elembloi, maibé xapa matrikula (plat) karreta nian taka metin ho surat-tahan mutin, nune'e ema labele hatene, no identifika.

Maske karreta ne’ebé pestense ba membru Parlamentu Nasionál, maibé iha momentu liuhusi estrada Diasaun Delta ne’e laiha deputadu no kondutór mesak mak kondúz.

Tuir regra utilizasaun kareta Estadu inklui mós karreta ba deputadu sira hodi hala'o servisu estadu, no fiskalizasaun ba baze identifika problema sosial sira ne'ebé povu enfrenta.

Ho akontesimentu ne’e hatudu membru parlamentu sira maske ho intensaun ne’ebé di’ak, hodi halo observasaun ba situasaun iha baze.(*)