"Ami koondena maka’as aktu omesidiu brutal ba veteranu “Lemorai’, ami la simu ema oho ita-nia maluk veteranu hanesan animal tanba veteranu nu’udar patrimoniu sagrada estadu nian, ami hakarak hato’o katak krime ho karater hanesan ne’e akontese dalabarak ona iha pasadu hasoru veteranu sira”, dehan PortaVoz, Bernardino De Cristo Fereira “Teki Timur", iha Fatuhada, segunda (18/10).

Tamba ne’e husu ba órgaun judisiáriu sira atu halo investigasaun profundu no julgamentu própriu hodi aplika pena ne'ebé todan hasoru autóri kriminozu sira ne'ebé habadak ona veteranu sira-nia vida ka halo violensia hasoru sira.

"Ami mós husu ba Parlamentu Nasionál no Governu atu projeta lei espesífiku ida hodi valoriza no fó protesaun própriu ba as’uain FALINTIL sira iha sosiedade nia leet, se laiha forma protesaun hanesan ne’e mak ami fiar katak violénsia hasoru veteranu sei akontese tan iha futuru”, afirma nia.

Aleinde ne'e husu ba joven sira no públiku enjerál atu respeita no tane aas veteranu sira tanba ho sira-nia dedikasaun no sakrifisiu mak ohin loron ema goza independénsia. (*)