"Ba Komisaun F, meza fó servisu atu aprova iha espesialidade lei sistema de saúde. Sé aban la hotu, kinta. Depois mak bele tama ho lei kona-bá protesaun labarik, tanba ita haree ninia urjénsia ne'e, ida lei sistema saúde ne'e urjénsia liu”, deklara Aniceto hafoin entrega Proposta-Lei OJE 2022 ba Komisaun Espesializada hamutuk iha Plenária PN, tersa (19/10).
Dadauk, Parlamentu Nasionál, altera ona Lei Sistema Saúde iha jeneralidade ho rezultadu votasaun a-favór 37, kontra 2 no abstensaun 13.
Nune’e proposta lei alterasaun ba Sistema saúde aprovadu iha jeneralidade, no faze tuir mai sei kontinua debate espesialidade ne'ebé sei hala'o husi Komisaun F ho Ministériu Saúde.
Tanba ne'e, meza deside entrega servisu ne'e ba Komisaun F atubele Organiza tempu ho membru Governu sira, oinsá mak bele prepara ba aprovasaun.
"Mais interese prezensa governu ninian, lahatene aban kuarta-feira normalmente Governu iha konsellu Ministru, bele ka la'e, maibé agora filafali ba komisaun ida-ida atu organiza tempu ne'e ho membru Governu relavante”, afirma nia.
Prezidente Komisaun F, Noe da Silva "Buka Tuir" hatete, dadaun ne'e sira kria ona ajenda atu hala'o debate espesialidade ba lei sistema saúde ne'e maibé posibilidade sei kansela no adia fali ba tempu seluk tanba membru Governu sira hala'o hela atividade balun iha Munisípiu Ermera.
"Atu informa de'it ba señor prezidente katak, ohin (19/10) tau duni ona iha ajenda ba kuarta-feira agora atu halo audénsia ba lei sistema saúde, maibé señora Ministra Saúde ho Vise Ministru agora iha hela Ermera. tanba ida ne'e mak sira la disponivél atu mai tuir audénsia, nune'e ami muda fali ba semana-oin”, dehan nia.
Pozisaun Governu hodi aprezenta proposta alterasaun Lei Sistema Saúde atu fasilita autoridade kompetente sira iha matéria vijilánsia epedemilíjiku no sanitáriu atu uza mekanizmu protesaun ba saúde públika ho objetivu atu evita no neutraliza riksu sira hodi labele da’et ba populasaun.
Maibé entre medida protesaun ba saúde públika ne’ebé inklui iha diploma ida ne’e, sei iha mós posibilidade atu ema sé de’it tenke halo ezame médiku no bainhira deskonfia moras ruma ne’ebé inklui mós iha lista ne’ebé prevé ona iha lei ka regulametu adminsitrativu, mak tenke lori ba internamentu ka tratamentu komplusivu ba fatin izolamentu no kuarantena. (*)
