Kazu administrasaun danoza ba projetu reabilitasaun estrada husi suku Uatu-Haco ba Uaioli, Postu Administrativu Venilale, Munisípiu Baukau, ne’e deskonfia envolve Eis (PAM) Baukau, ho inisiál AAG, Tékniku Obras Públika ho inisiál V no Tékniku Ajensia Dezenvolvimentu Nasionál (ADN) inisiál ET.
Arguidu na’in-tolu tuir prosesu julgamentu iha Tribunál Distritál Baukau (TDB), husi loron 19 Outubru tinan 2021, tanba kontra kódigu penál artigu 274 (adminitrasaun danoza) ho ameasa pena prizaun tinan 1 to’o 4 ka 2 to’o 6 tuir gravidade krime.
Haree ba projetu ne'ebé liuhusi PDD 1 (Planu Dezenvolvementu Distrital) ho valór osan rihun-US$366-resin ne'e ajudikasaun ba kompaña Ocadaba nu'udar implemendór projetu.
Ba kazu ne’e, julgamentu ne’ebé hala’o iha loron (19/10) arguidu na’in-2 ne’ebé konfesa katak, mudansa implementasaun projetu husi kilometru 2.5 ba 7 kilometru, tanba bazeia ba kondisaun terenu mak nu'udar tékniku halo mudansa husi item ponte, barajen, moru protesaun hodi aloka fali orsamentu ba item ateru estrada tuir ezizensia husi komunidade.
Kazu refere akontese iha tinan 2013 relasiona ho projetu reabilitasaun estrada diresaun Uaioli ba Uatu-Haki, Postu Venilale ne'ebé iha títulu projetu kilometru 12, implementasaun faze dahuluk kilometru 2.5 ne'ebé ikus mai iha alterasaun tuir terrenu implementa kilometru 7.
Projetu refere hetan ona pagamentu totál ba kompaña antes Komisaun Anti Korrupsaun (KAK) deteta no levanta ba Ministériu Públiku (MP) ne’ebé nu'udar na’in ba kazu.
Defensór husi arguidu AAG, José de Lima hatete, eis administradór la envolve dereita ba kazu refere, tanba tuir kompetésia nu'udar pesóal jestór ba prosesu administrasaun.
"Tuir lolós nu'udar Koordenadór, administra de’it, tanba enkamina karta ruma ba nasionál bazeia relatóriu, entaun tékniku rekomenda, tanba la’ós ema tékniku," esplika José de Lima iha Villa-Nova-Baukau, kuarta (20/10).
Bazeia ba kazu ne’e, administradór hein esplika prosesu admistrasaun husi inisiu projetu, lala’ok implementasaun kona-ba mudansa terrenu to’o finalizasaun inklui prosesu pagamentu.
Ba kazu ne’e, julgamentu TDD Baukau adia ba loron 26 fulan-outubru tinan 2021, tanba iha julgamentu ba kazu seluk ne’ebé presiza atu halo.
"Horisehik adia tiha de'it, tanba horisehik mós ami iha julgamentu ida kona-ba kazu balun ne'ebé adia fali ba loron 26 kontinua rona tékniku ADN", dehan defensór ne’e.
Durante julgamentu ne’e, prezide husi Juis koletiivu, José Escurial, Ministériu Públiku reprezenta husi prokuradór, Adérito Tilman no arguidu AAG hetan asisténsia legál husi defensór públiku, José de Lima. (*)
