BEKORA – Dadus estatistika hosi prijaun Bekora kona – bá total prijioneiru sira oras ne’e hamutuk ema nain 569. 

Diretor Prijaun Bekora, João Domingos katak, hosi númeru ne’e dadur joven hamutuk 39, prijioneiru kondenadu hamutuk 415, prijioneiru preventiva hamutuk 154. 

Iha mós dadur estranjeiru hamutuk 16 mai hosi Indonezia nain hitu (7), Xineza nain tolu (3), Austrália nain rua (2), no Filipina nain ha’at (4). Priojioneiru ba krime droga hamutuk ema nain ne’en hanesan Indonézia nain ha’at (4), Timoroan nain ida, no Austrália nain ida. 

Iha mós membru F – FDTL nain rua (2), eis membru PNTL nain rua (2).  

“Hosi númeru prijioneiru ne’e sira iha komportamentu di’ak, tanba to’o agora ita boot sira la rona sira perturba seguransa tantu iha Bekora no Glneo, maibé buat hotu la’o ho di’ak,” hatete diretor João ba Tempo Timor iha prijaun Bekora, Dili foin lalais. 

Iha mós prijioneiru hamutuk ema nain 11 mak sofre hela moras mental, maibé parte prijaun serbisu hamutuk ho ministériu saúde hodi halo tratamentu intensivu ba prijioneiru hirak ne’e. No hamutuk nain hitu (7) mak sofre moras TBC. 

“Iha dotor psikiater ida mak halo tratamentu ba sira kada loron Sesta. Moras hirak ne’e mosu iha liur mak lori mai iha prijaun”. (Oki)