Items filtered by date: Friday, 17 April 2020

Tempotimor (Dili)-Primeiru Ministru Taur Matan Ruak, agradese Prezidente Repúblika Dr. Francisco Guterres Lu Olo relasiona ho konfiansa nafatin ba VIII konstitusional atu kontinua halao nia fungsaun.

"Agradese sua exelensia Prezidente repúblika kona ba konfiansa ne'ebé fo ba VIII guvernu, liuliu Primeiru ministru atu kontinua dezempena ninia servisu, lidera VIII guvernu. Hanesan ita bo'ot sira hatene, hau retira fali hau nia pedidu demisaun i sua exelensia Prezidente repúblika aseita i fo nia konfiansa tomak ba VIII guvernu konstitusional," dehan Taur Matan Ruak iha Palácio Prezidensial Nicolao Lobato Bairo-pité Dili, Sesta (17/04).

Entertantu Hafoin enkontru semanal entre titular rua ne’e, Primeiru-Ministru haruka karta ba Prezidente Repúblika hodi reafirma nia pedidu dada fali ninia karta pedidu demisaun.

liu husi komunikadu imprensa ne'ebé www.tempotimor.com asesu Prezidente Repúblika haruka ona karta ba Primeiru-Ministru katak aseita Primeiru-Ministru dada-sai karta pedidu demisaun ne’e.

Husi esplikasaun karta refere mos hateten katak Tuir artigu 112°, alínea b) Konstituisaun RDTL, kompete ba Prezidente Repúblika simu ka la simu pedidu demisaun husi Primeiru-Ministru.  Kompete mós ba Prezidente Repúblika, aseita ka lae pedidu dada-sai pedidu demisaun husi Primeiru-Ministru, bainhira Prezidente Repúblika seidauk foti desizaun kona-ba pedidu demisaun.

"Liu husi karta ne’e, Prezidente Repúblika reafirma katak Primeiru-Ministru sei hala’o nafatin ninia knaar baibain ho efeitu konstitusional  no legál hotu-hotu,"

Prezidente Repúblika hatete mós katak sei fó kolaborasaun institusional ne’ebé presiza atu Primeiru-Ministru bele hala’o ninia mandatu nu’udar Xefe Ezekutivu, atu asegura funsionamentu regular VIII Governu Konstitusional, tuir ita-nia Konstituisaun Repúblika.(*)