Tempotimor (Díli)-Deputada Parlamentu Nasionál (PN) husi bankada Congresso Nacional Reconstruçăo Timor-Leste (CNRT), Carmelita Caetano Monis husu ba Visé Ministru Justisa (MJ), José Edmundo Caetano atu esolika ho klareza kona-ba polítika foun husi MJ nian, ne'ebe tuir planu atu haruka prizioneriu ba eskola iha liur.

Carmelita hato'o kestaun ne'e, relasiona ho deklarasaun husi Visé MJ nian ne'ebé deklara ba públiku iha loron Kuarta (29/07) kona-ba atu halo programa foun ho termu jurídiku "Rejíme Aberta" ba prijioneiru sira atu bele hala'o atividade iha liur.

"Ha'u husu tok, ida ne'e, keta polítika ka programa foun ida karik, ida ne'e faz-parte pena ka, ou faz-parte promove ita nia prizioneiru sira," hatete deputada Carmelita Caetano Moniz durante intervensaun liuhosi debate espesialidade ba proposta OJE 2020 iha plenári PN, tersa (6/10).

Nia hatete, sé MJ iha polítika foun tanba de'it ho asesóres ne'ebé barak, hodi fó ona hanoin foun ida ba Visé MJ, entaun esplika took, sé programa ne'e mak mosu, ida ne'e atu responde ho orsamentu husi Item ida ne'ebé.

Hatan ba kestaun ne'e, Visé Ministru Justisa, José Edmundo Caetano hatete, Programa ne'ebé MJ planeia, laiha intensaun no polítika foun atu haruka prijoneiru ida atu sai husi ita nia rain.

Maibe tuir nia, planu ne'ebe sira kria, bazeia ba rejíme abertu, signifika sei buka fatin própoiu ida, atu utiliza ba prizioneru tuir formasaun.

"Saida mak tenta atu halo agora, i ita halo hela preparasaun, atu aplika rejíme abertu, ba ita nia prizioneiru sira", nia kestiona.

Tuir nia, planu fó formasaun ba prizioneru, ida ne'e hanesan polítika ida atu halo tranzisaun ba re-integrasaun sosiál, maibé la'ós atu haruka ba estranjeiru, inklui La'ós atu haruka ba eskola iha Universidade Liceu sira.

"Sira iha fatin própiu para atu tuir formasaun, no preparasaun ba re-intergrasaun sosiál, sai televizaun infelizmente ha'u mós la haree dehan atu ba iha estrajeiru, sé dehan sai ba estranjeiru karik, lori ministemériu nia naran husu deskulpa ba Señora deputada", dehan Edmundo.

Molok ne'e, Visé Ministru Justisa (MJ), José Edmundo Caetano mós deklara, tuir loloos kapasidade prizaun Bekora akumula de’it prizioneiru na’in 250, maibé daudauk ne’e prizioneiru ne’ebé hela iha Prizaun Bekora sa’e to’o na’in 591.

"Tanba ne'e, ba oin ha'u sei halo programa ida ne'ebé moderniza prizaun ne'e ho di'ak ba futuru joven sira ne'ebé mai kumpri pena iha prizaun iha ne'e, sira bele halo mós serbisu seluk iha liur," nia afirma.

Tempotimor (Dili) – Sekretariu Jeral G7+ Helder da Costa hatete, paz no estabilidade iha nasaun Timor-Leste agora la'o di'ak tebes no sai mós hanesan lisaun ida atu hanorin nasaun pos konflitu sira seluk.

"Lisaun boot ida, ita hanorin ba pais sira seluk mak ne'e, laiha ona konflitu no violénsia. Maski iha empase no inserteza polítika. Kuandu buat hirak hanesan ne'e mak mosu iha rai seluk, funu mosu ona. Tanba, situasaun sira ne'e ema komesa inpasensia azita tun sa'e. Mais, grasas a deus ita Timor la hanoin ona buat sira hanesan ne'e," esplika Sekretáriu Jerál G7+, Helder da Costa ba jornalista sira iha Palásiu Governu, Tersa (10/12/19).

Nia afirma, Timor-Leste agora unidade no paz. Tanba, iha lideransa ne'ebé forte no povu mós  maduru i kompriende ona prinsípiu demokrasia. Liuliu joven sira. Maski tentasaun oioin, maibé hakmatek ona. Ida ne'e, hanesan lisaun ba nasaun sira seluk.

Helder dehan, sidadaun hotu-hotu kompriende ona kona-ba demokrasia. Nune'e, mantein nafatin paz no estabilidade, hodi hala'o dezenvolvimentu.

Nia relata, iha situasaun polítika Timor nian, governu nafatin funsiona ho di'ak. Tanba ne'e, konsidera ita nia rai nafatin, paz no estabilidade. Helder espera, ba oin TL bele dezenvolve di'ak liután.

Tempotimor (Dili) – Prezidente Repúblika Francisco Guterres Lú Olo deside hodi fó liberdade ba prizioneiru na'in rua (2) no hamenus pena prizaun ba prizioneiru na'in neen (6) seluk.

Liu husi komunikadu imprensa ne'ebé Tempotimor.com asesu hatete, PR Lu Olo ezerse ninia kompeténsia konstitusionál hodi fó  indultu totál ka livre no parsiál ka hamenus pena prizaun ba prizoneiru na’in 8 iha loron komemorasaun Proklamasaun Independénsia  ba dala 44 ne'ebé monu iha 28 Novembru, aban.

"Liuhusi Dekretu Prezidente Repúblika númeru  51/2019, 52/2019, 53/2019, 54/2019, 55/2019, 56/2019,  57/2019, iha loron 27 fulan Novembru,  Xefe Estadu uza nia kompeténsia eskluziva, hafoin rona Governu, fó indultu totál ba Juliana Vidigal da Silva no Amancio Lopes  no  parsial ba prizioneiru hodi hamenus pena fulan 6 ba Donato Fernandes,  Ercio da Conceição no João Miguel Arcanjo do Rego Correia Matos, tinan 1 ba Etelvino Costa Saldanha no tinan 2 ba Zeferino da Silva Soares no Marcelo Soares," informa komukadu husi Palasiu Prezidensial, Kuarta (27/11/19)

Tuir artigu 85, alinea 1 husi Konstituisaun Repúblika hateten katak Prezidente Repúblika de’it mak bele fó indultu ka hamenus kastigu, hafoin rona Governu ne’ebé konjuga ho artigu 3 no 4 Lei númeru 5/2016, 25 Maiu.

"Definisaun saida mak indultu no hamenus kastigu haktuir iha Kódigu Penál ne’ebé aprova ho Dekretu Lei númeru 19/2009 no Lei númeru 15/2016 mak regula kondisaun no prosedimentu atu fó indultu ka hamenus kastigu. Prezidente Repúblika halo nia kompeténsia tuir de’it lei haruka," afirma komunikadu ne'e.

Entretantu, Dekretu Prezidente hirak ne'e sei tama iha vigor iha 28 Novembru 2019.

Tempotimor (Dili) – Relasiona ho Timoroan sira-nia pasaporte ne'ebé mate iha estranjeiru, Ministériu Negósiu Estranjéiru no Kooperasaun (MNEK) servisu hamutuk ho Ministériu Justisa (MJ) forma ekipa levantamentu dadus nian ba rai liur, hodi identifika Timoroan sira ne'ebé pasaporte mate ona.

"Tinan oin, Ministériu Justisa (MJ) nia ekipa ba para haree pasaporte hirak ne'e. Tanba, ema na'in hira ita seidauk identifika. Nune'e, ita haruka uluk ekipa balun para halo levantamentu dadus," dehan MNEK, Dionísio Babo Soares iha Palásiu Governu, Kuarta (20/11/19).

Dionísio dehan, bainhira levantamentu dadus hotu ona, foin mak foti desizaun no entrega dadus hirak ne'e ba Ministériu Justisa. Liuliu ba diresaun ne'ebé toma konta ba pasaporte ninian. MNEK, tuir Babo, fasilita halo levantemantu dadus husi Timoroan sira iha Inglaterra, Irlandia no Portugál.

MNEK mós husu ba Timoroan sira iha Inglaterra, Irlandia no Portugál atu prepara an. Tanba, ekipa levantamentu dadus sei semana ida iha Inglaterra, depois ba fali Irlandia-norte no Portugál.

Tempotimor (Dili) – Ministru Justisa (MJ) Manuel Cárceres da Costa aprezenta Dekretu do Governu ida, ba Konsellu Ministru (KM) ne'ebé bele regula karreira majistradu sira iha Ministériu Públiku (MP).

"Ohin Ministru Justisa aprezenta mós kona-ba proposta Dekretu do Govemu, ne’ebé aprova husi Konsellu Ministru, kona-ba Atualizasaun Kuadru Pesoál iha Ministériu Pilbliku," dehan MJ Manuel Cárceres da Costa, hafoin reuniaun Konsellu Ministru, Kuarta (20/11/19).

Nia afirma, Dekretu do Governu ne’e atu kria kondisaun hodi regula dezenvolvimentu iha karreira majistratura husi Ministériu Públiku no hodi haluan vaga servisu ba fatin-fatin ho karreira ne’ebé hanesan.

“Iha kumprimentu husi ezijénsia legalmente estabelesidu no iha kumprimentu husi objetivu ne’ebé tau ona iha Programa VIII Governu Konstitusionál, hanesan konsolidasaun iha seitór justisa, ho rekursus umanu ne’ebé kompetente, independente no profisionál," esplika MJ Cárceres.

Tempotimor (Dili) – Seidauk iha Lei atu proteje diretu labarik sira nian iha Timor-Leste, sai preokupasaun boot ba  Fundasaun Forum Comunicação Juventude (F-FCJ) Don Bosco, Balide.

Tan ne'e, Fundadór F-FCJ Balide, Cipriano Freitas ezije Governu atu aselera lalais Lei Protesaun ba Labarik no Kódigu Labarik nian.

"Iha kazu barak iha tribunal, ne'ebé konsidera labarik sira hanesan ema adultu. Oráriu atu halo julgamentu ba labarik la tau espesiálidade. Tanba ne'e, ezije lei ne'e iha para atu tau atensaun espesiál ba kazu labarik sira iha tribunál,” dehan fundador F-FCJ Balide ne'e, Tersa (19/11/19).

Nia dehan, tempu to'o ona para Governu tenke hanoin. Tanba, iha kazu barak liu ne'ebé ligasaun ho labarik. Cipriano fó ezemplu kazu soe bebe, abuzu sexuál, abandonadu, violénsia sexuál, insestu no kazu seluk, ne'ebé tuir Cipriano, presiza ona atu Governu tau atensaun.

"Lei ne'ebé iha ona la garante labarik sira hanesan iha konstituisaun. Kódigu Sivíl de'it ne'ebé tuir ami nia haree, ladún detallu fó atensaun ba kazu ne'ebé labaraik sira iha no infrenta. Diferensia ho Lei Kódigu ba Labarik no Lei Protesaun ba Labarik. Tanba ne'e, mak ami ezije. Lei ne'e kleur ona," nia hatutan.

Tempotimor (Dili) – Presidente Tribunal Rekursu, Deolindo dos Santos deklara, Ministériu  Justisa mak iha kompetensia tomak atu bele foti desizaun ba rekrutamentu juiz, wainhira númeru juiz la to'o hodi atende kazu sira iha tribunál.

Servisu iha nasaun ida ho juiz nain 30 resin de'it ne'e, la fasil. Signifika katak juiz sira sei menus. Solusaun mak esforsu hodi buka no rekruta tan juiz foun, observasista foun no funsionáriu foun.

“Kona-ba juiz, ha'u rasik halo pedidu ba Ministru Justisa para atu bele loke konkursu ba formasaun juiz sira nian. Ha'u hato'o ida ne'e, dala rua ona no dezisaun iha ministru nia liman, hodi deside," dehan Deolindo iha Palásiu Prezidensiál Bairru-pite, hafoin halo enkontru ho Prezidente Repúblika, Segunda (18/11/19).

Tuir Deolindo, konsellu subtitutu ona juiz na'in tolu ba tribunal, ne'e para atu taka kuandu bainhira juiz nain haat ne'e iha impedimentu ruma ou auzensia ba liur, ne'ebé labele kompleta desizaun koletiva.

Kona-ba observasista ne'e rekruta hotu ona atu prenxe servisu no iha nain haat mak sei pendente hela. Tribunál mós, tuir Deolindo, sei halo rekrutamentu funsionáriu balun. Tanba sei loke tan  diresaun tezouru tanbá alende prosesu bain-bain, ko'alia mós kona-ba kustu nian.

PTR hato'o mós ba PR kona-ba difikuldade balun hanesan rezidensia ba juiz sira nian iha Baucau, Oekusi no Suai.

Troka Juiz Guilermino

Alende ne'e, to'o agora Tribunál Rekursu mós seidauk foti dezisaun hodi bele nomeia ema atu troka matebian juiz Guilermino da Silva nia fatin.

"Guilermino nia fatin ami seidauk deskute iha konsellu, tanba ne'e konsiderasaun ne'ebé importante tebes," dehan Deolindo.

Nia esplika, mudansa juiz ne'e fó implikasaun ba servisu no depois juiz balun formasaun iha liur hela entaun seidauk deside atu bele identifika se mak bele subtitui ba Guilermino nia fatin nian.

"Ami sei hare'e katak bainhira nomeia hela ida atu subtitui permanente, entaun nia labele envolve iha servisu seluk. Ita labele taka ko’ak ida ne'e no loke fali ko’ak seluk. Ida ne'e mak labele," nia afirma.

Tempotimor (Dili) – Diretór Estabelesimentu Prisionál Becora, João Domingos hatete nia parte sei halo ezame médiku ba arguido CdJ, ne'ebé iha Segunda (14/10/19) lokraik halo asaun tentativa atu xoke aviaun Sriwijaya Air ho ninia motor Honda Revo, iha Aeroportu Internasionál Nicolau Lobato, Comoro, Dili.

João Domingos hatete, parte prizaun simu ona suspeitu ne’e bazeia ba mandado hosi Tribunál. Suspeitu CdJ tama ona iha prizaun Becora iha Kuarta, 16 Outubro 2019 tuku 06.00 loraik.

“Komentariu iha públiku katak suspeitu ne’e sofre moras mentál. Maibé, iha parte prizaun seidauk hatene kona-ba nia moras mentál ka lae. Tanba, tenke iha ezame médiku ida mak foin bele hatene loloos,” hatete João Domingos ba tempotimor.com iha Prizaun Becora, Kinta (17/10/19).

Ho kestaun ne’e, tuir João, ohin sira hahú halo ona asesmentu kona-ba suspeitu ne’e nia kondisaun saúde.

“Depois asesmentu finál mak ita hatene nia moras mentál duni ka lae. Karik, nia moras mentál duni mak entrega ba doutor psikiatria hodi halo tratamentu kona-ba moras mentál,” João esplika.

Mandatu hosi Tribunál, suspeitu CdJ aplika prizaun preventiva. Antes ne’e, suspeitu CdJ nia familia tomak deklara, suspeitu ne’e koñesidu nu’udar lanu-teen ida. Tanba nia sempre hemu tua.

Entretantu, primeiru interogatóriu ne’ebé hala’o iha Kuarta (16/10), estatutu suspeitu CdJ ne’e nakfilak ona ba arguido. Tribunál Munisipál Dili mós aplika ona medida koasaun prizaun preventiva.

Maibé, defeza arguido nian, Defensor Públiku Sebastião Amado konsidera desizaun Tribunál ne’e la justu. Tanba, tuir Sebastião, fallansu ne’e iha ekipa seguransa Aeroportu Comoro.

Iha primeiru interrogatóriu ne’e, Ministériu Públiku promove arguido ho prátika krime tama iha fatin seluk ne’ebé taka ba públiku no atentadu ba seguransa no transporte ne’ebé previstu iha artigu 186, 210, Kódigu Penál Timor-Leste.

Maibé, husi parte defeza preokupa ho arguido nia kondisaun saúde ho razaun durante audiénsia primeiru interogatóriu, arguido deklara katak Maromak mak haruka nia halo asaun ne’e.

“Arguido nia kondisaun mentál ladún di’ak no nia hatán arbiru de’it. Nia dehan tama iha aeroportu ne’e Maromak mak haruka. Signifika ema ne’e ladún normál,” esplika defensor Sebastião.

Tempotimor (Dili) – Problema rai ho estatutu laloos, fó dúvida ba investidór sira husi estranjéiru atu mai investe iha Timor-Leste, tanba la seguru.

"Lei rai ne'e importante ba sidadaun timoroan sira nomós ba investidór sira. Enkuantu rai ne'e nia estatutu seidauk loloos ne'e prekondisaun ida ne'ebé kee ejize husi investidór sira hakarak seguransa ba sira,” dehan Vise Prezidente Bankada FRETILIN, Francisco Miranda Branco iha PN, Kinta (17/10/19).

Branco dehan, se investe iha rai ida ne'ebé nia estatutu laloos, bele hamosu problema. Se Timor-Leste nia estatutu rai seidauk loos hanesan agora daudaun ne'e mós, kondisaun ida la kria, hodi atrai investidór sira mai ita nia rai.

"Agora, hotu-hotu hakfodak ba projeitu tasi mane. Problema rai. Hadau malu rai, maibé estatutu rai rasik lei seidauk iha atu define loloos. Ida ne'e mak problema ka vakum ida ne'ebé mak akontese ema manipula tuun sa'e. Enkuantu ita laiha koñesimentu ba lei, entaun bele akontese kazu sira hanesan ne'e," dehan Branco.

Nia afirma,  bainhira estatutu rai loos ona, bele fó garantia ba rai na'in atu asesu ba banku tanba rai nu'udar fatór ekonómiku.

Iha fatin hanesan deputadu CNRT, Patrocino dos Reis katak, lei rai nian presiza kompleta ho dekretu lei sira.

"Lei rai nia aprova ona, hein para halo kompleta ho dekretu lei, hodi atribui títulu ne'e mak seidauk kompleitu," dehan Patrocino.

Nia husu ba entidade hotu-hotu obedese ba lei ne'ebé mak iha, hodi nune'e labele hamosu problema.

Page 1 of 4

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« January 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks