Tempotimor (Dili) – Pasa revista ne'ebé Unidade Polísia Fronteira (UPF) hamutuk ho Polisia Militár (PM) no Alfandega hala'o, Kinta (17/10/19) maizumenus tuku 2.30 OTL, konsege prende atribuitu eis organizasaun PSHT, ne'ebé tama mai rai laran, liuhosi Fronteira Batugede, Munisípiu Bobonaro.

"Komandu hakarak fó sai rezultadu pasa revista, kooperasaun koordenada entre komandu UPF, Polísia Militár no alfandega,” informa Komandante Operasaun Nasionál PNTL, Superintendente Xefi Pedro Belo iha Kuartél Jerál PNTL, Kaikoli Dili, Sesta (18/10/19).

Tuir Pedro, iha loron Kinta 17 Outubru 2019, maizumenus tuku 2.30 OTL, UPF hamutuk ho Polísia  Militár, deskonfia paket foun ne'ebé tama liuhosi área Alfandega nia fatin halo pasa revista. Tanba sasán ne'e deskonfia, entaun membru UPF no Polísia Militár haruka sobu no hetan kartaun identidade, nomós fardamentu eis organizasaun PSHT mak iha laran.

Pedro dehan, atribuitu ne'ebé hetan prende ne'e, laiha identidade klaru husi ema ne'ebé simu no ema ne'ebé haruka mai Timor-Leste.

"Pakote ne'ebé tama mai liuhosi travel Paradise ne'e, laiha identidade no laiha ema mak atu simu. La klaru. Hakerek de'it númeru no naran inisiál. Naran ema ne'ebé haruka mai mós laiha," esplika Pedro.

Nia afirma, atribuitu ne'ebé parte seguransa prende mak hanesan fardamentu, kartaun membru PSHT no seluk tan.

"Evidénsia sira ne'ebé mak ekipa koordenada prende mak hanesan, fardamentu hamutuk 53, kaos hamutuk 23 nomós iha sintu boot no sintu kiik, no haree mós back jardim identidade ne'ebé mak ita hetan hamutuk 29, maibé kestaun ida ne'e hatudu momoos katak eis organizasaun PSHT iha ligasaun metin ho Indonézia, tanba uza sigla bandeira Merah Putih, ne'ebé mak ho klaru bandeira Merah Putih," Pedro afirma.

Eis Komandante PNTL Munisípiu Dili ne'e subliña, modus ne'ebé eis organizasaun PSHT iha mak modus krime organizadu.

"Tanba ne'e, modus ne'ebé mak dadaun ne'e sira uza, modus krime organizadu nian, tanba ita hotu akompaña, ita hotu hatene katak iha krime organizadu ne'ebé mak liuliu droga, ne'ebé lori pakote, sasan sira ne'e ba iha rai ne'ebé de'it, sira la uza sira nia naran, la uza sira nia hela fatin no seluk tan. Dadaun ne'e ita hotu hatene, eis organizasaun sira ne'ebé mak estadu taka tiha ona, sira uza sira nia modus hanesan ho modus ne'ebé mak durante ne'e sira uza," nia esplika

Nia parte husu ba komunidade sira atu toma atensaun ba grupu hirak ne'e. Tanba, bele kria instabilidade.

"Tanba ne'e mak hodi Komandu Jerál nia naran, husu ba komunidade hotu hodi fó atensaun maka'as ba grupu organizadu sira ne'e. Tanba, grupu organizadu ida ne'e bele estraga estabilidade nasionál. Tanba ligasaun ne'ebé sira halo ho parte Indonézia ninian. Sira uza bandeira Merah Putih para mai no daudaun ne'e sira halo ona sira nia rede iha Timor laran tomak," Pedro subliña.

Tempotimor (Dili) – Diretór Estabelesimentu Prisionál Becora, João Domingos hatete nia parte sei halo ezame médiku ba arguido CdJ, ne'ebé iha Segunda (14/10/19) lokraik halo asaun tentativa atu xoke aviaun Sriwijaya Air ho ninia motor Honda Revo, iha Aeroportu Internasionál Nicolau Lobato, Comoro, Dili.

João Domingos hatete, parte prizaun simu ona suspeitu ne’e bazeia ba mandado hosi Tribunál. Suspeitu CdJ tama ona iha prizaun Becora iha Kuarta, 16 Outubro 2019 tuku 06.00 loraik.

“Komentariu iha públiku katak suspeitu ne’e sofre moras mentál. Maibé, iha parte prizaun seidauk hatene kona-ba nia moras mentál ka lae. Tanba, tenke iha ezame médiku ida mak foin bele hatene loloos,” hatete João Domingos ba tempotimor.com iha Prizaun Becora, Kinta (17/10/19).

Ho kestaun ne’e, tuir João, ohin sira hahú halo ona asesmentu kona-ba suspeitu ne’e nia kondisaun saúde.

“Depois asesmentu finál mak ita hatene nia moras mentál duni ka lae. Karik, nia moras mentál duni mak entrega ba doutor psikiatria hodi halo tratamentu kona-ba moras mentál,” João esplika.

Mandatu hosi Tribunál, suspeitu CdJ aplika prizaun preventiva. Antes ne’e, suspeitu CdJ nia familia tomak deklara, suspeitu ne’e koñesidu nu’udar lanu-teen ida. Tanba nia sempre hemu tua.

Entretantu, primeiru interogatóriu ne’ebé hala’o iha Kuarta (16/10), estatutu suspeitu CdJ ne’e nakfilak ona ba arguido. Tribunál Munisipál Dili mós aplika ona medida koasaun prizaun preventiva.

Maibé, defeza arguido nian, Defensor Públiku Sebastião Amado konsidera desizaun Tribunál ne’e la justu. Tanba, tuir Sebastião, fallansu ne’e iha ekipa seguransa Aeroportu Comoro.

Iha primeiru interrogatóriu ne’e, Ministériu Públiku promove arguido ho prátika krime tama iha fatin seluk ne’ebé taka ba públiku no atentadu ba seguransa no transporte ne’ebé previstu iha artigu 186, 210, Kódigu Penál Timor-Leste.

Maibé, husi parte defeza preokupa ho arguido nia kondisaun saúde ho razaun durante audiénsia primeiru interogatóriu, arguido deklara katak Maromak mak haruka nia halo asaun ne’e.

“Arguido nia kondisaun mentál ladún di’ak no nia hatán arbiru de’it. Nia dehan tama iha aeroportu ne’e Maromak mak haruka. Signifika ema ne’e ladún normál,” esplika defensor Sebastião.

Tempotimor (Dili) – Sidadaun estranjeiru ida hosi nasaun Mali ho naran Ahmed Suiman (27), kuaze fulan 5 ona sulan iha Sentru Resepsaun Azilu (SRA) iha Aeroportu Internasionál Prezidente Nicolau Lobato, Comoro, Dili tanba tama mai Timor-Leste ilegál.

Ba tempotimor.com, Ahmed konta tuir inisiu nia mai liuhosi territóriu Indonezia, liubá Kupang (NTT) mak tama mai Timor-Leste liuhosi fronteira rai maran, Postu Batugade, Munisípiu Bobonaro.

“Ha’u mai to’o Kupang mak rona nasaun Timor-Leste nia naran. Ha’u buka konsuladu Timor-Leste nian iha Kupang hodi husu atu taka vistu. Maibé, konsuladu la fó. Nune’e, ha’u tama mai de’it la ho vistu mak polísia migrasaun kaer ha’u hodi lori ha’u mai tau iha fatin ne’e,” hatete Ahmed iha aeroportu Komoro, Dili, Kuarta (16/10).

Ahmed hatutan, antes ne’e polísia migrasaun lori ona nia hodi fila ba Indonézia. Maibé, autoridade Indonézia sira rejeita nia. Nune’e, lori fali iha Sentru Instalasaun Temporária iha aeroportu Comoro ne’ebé responsabiliza hosi polisia migrasaun Timor-Leste.

“Agora ha’u lakohi fila ba ha’u nia rain Mali ona, tanba ha’u nia rain iha hela konflitu laran. Ha’u nia aman-inan mate hotu ona. Ha’u hakarak husu azilu politika iha Timor Leste,” komenta Ahmed.

Nia promete katak, bainhira hetan direitu azilu politika iha Timor Leste nia sei la oho ema ida. Nia sei la repete asaun pasadu sira iha Mali.

Bainhira tempotimor.com hasoru Ahmed iha sentru instalasaun ne’e, Ahmed hatais hela kalsa naruk koor metan ida ho faru la ho gola koor mean, no ain mamuk. La hatais xinelus.

Kona-bá nia alimentasaun diaria (hahan lorloron), Ahmed haktuir katak foufoun uza nia osan rasik mak hodi sosa hahan loron-kalan, maibé oras ne’e hetan suporta uitoan hosi parte migrasaun Timor-Leste nian, no maske kuaze fulan 5 ona iha fatin ne’e, maibé Ahmed rasik seidauk hatene bainhira mak nia bele hetan vistu legal ida no hetan direitu azilu politika iha Timor-Leste.

“Ha’u hakarak hela iha ne’e ona, no lakohi fila ba Mali, tanba ha’u nia nasaun iha hela funu laran. Ha’u hakarak buka serbisu iha ne’e hodi aguenta moris. Ha’u mai iha Timor hodi buka salvasaun, mai buka moris,” konfesa Ahmed.

Entretantu, tuir informasaun balun ne’ebé tempotimor.com asesu iha aeroportu Comoro katak antes ne’e migrasaun Timor-Leste lori ona sidadaun Mali ne’e ba Indonézia, maibé Indonézia deside rejeita Ahmed ho razaun lubuk ida.

“Ha’u rona katak agora sira buka hela osan hodi deporta nia fila ba Mali. Maibé dalaruma osan seidauk iha mak to’o oras ne’e seidauk realiza,” hatete pesoal seguransa ida.

Mali nu’udar nasaun ida Afrika Osidental. Nasaun ne’e hasoru hela de’it konflitu tantu konflitu horizontal no vertikal. Nasaun ne’e nia naran ofisial mak Repúblika Mali (République du Mali) kolonializadu hosi Fransa durante tinan barak nia laran, no foin hetan nia independensia hosi Fransa iha loron 20 Juñu 1960, no sai independensia total iha loron 22 Setembru 1960.

Tempotimor (Dili) – Ministru Interiór (MI) interinu, Filomeno da Paixão de Jesus fó ona orientasaun ba Komando Jerál Polísia Nasionál Timor-Leste (PNTL), Faustino da Costa atu halo investigasaun kle'an ba pesoál Unidade Polísia Fronteira (UPF), iha Aeroportu Internasionál  Nicolau Lobato, Dili.  

Orientasaun husi MI interino ne'e, relasiona ho akontesementu ema sivíl motorizadu tenta atu xoke aviaun Sriwijaya Air, iha Aeroportu Internasionál Nicolau Lobato, loron hirak liubá.  

"Ema ne'ebé tama ba aeroportu ne'e lisaun boot ida ba ita. Suspeitu oras ne'e la'o hela investigasaun. Ha'u dehan ona ba komandu PNTL katak, ha'u hakarak investigasaun sériu tebetebes ba UPF ne'ebé iha ne'ebá. Tanba saida mak ema bele tama liu. Ha'u fó prazu ba sira hodi aprezenta ba ha'u hodi ita deside," afirma Filomeno Paixão iha Palásiu Governu, Kuarta (16/10/19).

Ministru ne'e rekoñese, situasaun ne'e bele akontese tanba frazilidade husi parte seguransa iha aeroportu.

"Frazilidade seguransa. Ha'u bele dehan hanesan ne'e. Nia dehan, nia lanu no problema emosionais mak tama ba. Maibé, bele mós ema aproveita tama ba no sei ne'e halo nusa!. Ne'e ita nia naran no oin monu kedas iha nasaun sira seluk nia oin," dehan Filomeno.

Meno konfesa, nia preokupa tebes ho situasaun ne'ebé tuir nia hanoin, labele akontese.

"Ha'u mós preokupa tebetebes. Tanba ne'e, mak ha'u ko'alia ho komandu PNTL para hola médidas ne'ebé haforsa ita nia seguransa sira," nia afirma.

Alende ne'e, Ministru Transporte no Komunikasaun (MTK), José Agustino da Silva mós husu parte seguransa atu halo investigasaun profunda ba akontesimentu ne'e.

"Ohin ha'u iha KM mós ko'alia kona-ba ida ne'e. Tanba ne'e, parte seguransa presiza halo investigasaun profunda liután. Tanba saida mak kazu ne'e bele akontese no motivu saida no se mak envolve iha laran," dehan MTK ne'e.

MTK husu parte hotu ne'ebé relevante, atu halo investigasaun kle'an atu nune'e bele hetan dadus ne'ebé loos, para nia parte mós bele informa filafali ba aviasaun hirak ne'ebé halo operasaun iha Timor-Leste.

Tempotimor (Dili) – Polisia Nasionál Serbisu Investigasaun Kriminal (PNSIK) sei lori suspeitu ne’ebé tenta soke aviaun Sriwijaya ba Hospital Nasionál Guido Valadares (HNGV) hodi halo atestadu mediku atu hatene suspeitu ne’e sofre moras mental ka lae.

Tempotimor (Dili) – Prezidente Parlamentu Nasionál (PPN) Arão Noé de Jesus da Costa Amarál konsidera, akontesimentu ema sivíl ho motor ne'ebé bele tama iha área kampu aviasaun Internasionál Nicolau Lobato, nuudar problema boot ba Timor-Leste.

“Akontesimentu ne'e fó duvidas boot ba estranjeiru sira atu mai vizita Timor-Leste,” PPN hatete iha Parlamentu Nasionál, Tersa (15/10/19).

Nia dehan, loloos akontesimentu ne'e, labele akontese. Tanba, nia impaktu boot ba ema atus resin ne'ebé iha hela aviaun laran.

"Asuntu la'ós atu investiga dei't suspeitu. Maibé, investiga mós ema ida fó autorizasaun bele tama iha fatin ne'ebá. No tama husi ne'ebé?" PPN ne'e afirma.

Arão husu ba Ministru Interiór para bele fó atensaun no investiga seguransa sira iha aeroportu. Tanba saida mak husik joven ne'e, tama to'o iha área ne'ebé loloos nia labele tama no perigozu.

"Akontesimentu ne'e sai problema boot ba nasaun Timor-Leste. Satán ita nia kampu aviasaun ne'e internasionál.  La'ós aviaun iha timor dei't mak semo iha ne'ebá," esplika Arão.

Ba relasaun internasionál, tuir PPN, akontesimentu ne'e grave tebes. Tanba, halo ona duvidas boot  ba estranjeiru atu tama mai Timor-Leste, bainhira iha situasaun sira hanesan ne'e.

PPN ne'e subliña, tenke foti sansaun ba joven ne'ebe tama ba kampu aviazaun no investiga seguransa iha fatin ne'ebá. Nia dehan, seguransa sira tenke responsabiliza para iha future, labele akontese tan.

"Ba jestaun sira iha aeroportu, responsabiliza ba akontesimentu ne'e. Frakeza iha liña seguransa nian entaun presiza haforsa. Se lae duvidas ba estranjeiru sira atu mai vizita nasaun Timor-Leste," tenik PPN.

Tempotimor (Dili) – Kazal Timoroan na'in rua, ne'ebé lori droga tama iha fronteira Indonézia iha ona prizaun preventiva.

"Informasaun ne'ebé iha mak ita nia ema na'in rua, ne'ebé detein iha sela Polísia Indonézia agora sira nia estatutu muda ona ba prizaun preventive. Entaun ita hein prosesu tuir mai," dehan Prokuradór Jerál Repúblika (PJR), José da Costa Ximenes iha Palásiu Prezidensiál Bairru-Pite, Segunda (07/10/19).

"Atu hateten katak ema sira ne'e arguidu. Se mak bele tau matan, mak Governu. Governu bele haree tanba arguidu sira eskolla ona advogadu, maibé Governu mós bele haree posibilidade saida mak bele halo hodi tulun sidadaun ne'ebé mak komete krime iha estranjéiru," PJR informa.

Tuir PJR ne'e, matéria ba kazal na'in rua ne'e responsabilidade Governu nian, hodi servisu hamutuk ho embaixadór Timor-Leste nian iha Indonézia, hodi akompaña prosesu. Tanba Prokuradór Jerál nia servisu mak oinsá atu buka dalan, para bele buka solusaun hamutuk entre nasaun rua ne'e.

Alende ne'e, arguidu sira ne'ebé oho Timoroan ida iha Yogyakarta, na'in tolu agora iha ona prizaun preventiva.

"Ema ne'ebé oho maluk Timoroan ida (João Bosco) iha Yogyakarta, dadaun ne'e na'in tolu iha ona prizaun preventiva, balun mai tiha iha Timor, filafali ba depois parte seguransa sira kaer kuaze na'in tolu, ne'ebé iha ona prizaun preventiva," tenik PJR.

Tempotimor (Dili) – Ministru Interiór (MI) interino, Filomeno de Jesus Paixão afirma, funsionáriu Polísia Imigrasaun nain 30, tenke fila ba funsionáriu reguler hanesan membru Polísia baibain. Tanba, servisu Polísia Imigrasaun, tuir dalan legál, presiza halo rotasaun.

"Servisu, kuandu tinan rua ou tolu ona presiza halo rotasaun. Tanba, iha fronteira ne'e la'ós hanesan ita nia uma lisan, para hela iha ne'ebá kleur. Se lae, orsida lisan aat mosu fali iha ne'ebá. Tanba ne'e, presiza troka husi ulun to'o ain," afirma Filomeno iha Palásiu Governu, Kuarta (02/10/19).

Nia dehan, funsionáriu Polísia Imigrasaun nain 30 iha fronteira ne'e, fila mai la'ós tanba de'it irregularidade. Maibé tanba presiza hala'o rotasaun servisu.

"Iha parte seluk, Lei mós la fó admite para funsionáriu Polísia hela iha imigrasaun fronteira permanente. Tanba ne'e, presiza troka," Paixão esplika.

Tempotimor (Dili) – Primeiru Ministru Taur Matan Ruak, lamenta ho atetude juventude ne'ebé la respeita malu, hodi halakon maluk seluk nia vida.

"Ita lamenta ida ne'ebé mate. Ita hein katak aban bainrua labele akontese-tan. Buat hotu ne'ebé halo ho insisiativa no respeita ba malu, labele provoka malu, tanba vida ida lakon ne'e, vida ne'ebé falta. Tanba ne'e lamenta teb-tebes," tenik Primeiru Ministru Taur Matan Ruak iha Palásiu Prezidensiál, Bairru-pite, Kinta (26/09/19).

Xefe Governu ne'e mós afirma katak,  kazu ne'e kriminál entaun justisa mak sei la'o.

"Kazu ne'e kriminál ne'ebé prosesu justisa mak la'o iha kualker forma. Maibé, situasaun kontroladu iha tempu ne'ebá tanba ita nia Polísia Nasionál Timor-Leste halo servisu di'ak. Nune'e, situasaun kontroladu no ema hotu la'o hanesan bai-bain," dehan PM Taur.

PM mós ilojia ba servisu Polísia Nasionál Timor-Leste ne'ebé hala'o servisu di'ak no lalais hodi rezolve situasaun hodi labele hada'et tan iha fatin seluk.

Lamenta Beibeik

Iha fatin seluk, Domingos da Cunha, komunidade Comoro ba tempotimor.com hatete, Governu presiza buka solusaun ne'ebé klaru kona-ba problema hanesan ne'e.

“Governu presiza buka solusaun, para bele hakotu no minimiza buat hirak ne'e. La'ós hotu de'it ho estetementu lamentasaun beibeik,” afirma Domingos, iha loja Lider nia oin, Kinta (26/09/19).

Alende ne'e, Domingos mós kestiona ho servisu PNTL nian, ne'ebé tuir nia, sei dook husi profesionalismu. Nia fó ezemplu kazu Ai-mutin ne'ebé nia dehan to'o agora seidauk kaer autór ne'ebé oho vitima iha konfrontu ida akontese iha Segunda (23/09/19) liubá ne'e.

“Ida polísia kaer mak autór ne'ebé inklui mós iha konfrontasaun ne'e. Maibé, se mak oho vitima ne'ebé mate iha momentu akontesementu ne'e, to'o agora públiku lahatene,” nia dehan tan.   

Tempotimor.com nota katak iha inisiu tinan ida ne'e de'it, mosu konfrontasaun ne'ebé inkliña arte marsiais iha Munisípiu Baucau (dala 2) nia rezultadu hamate no hakanek ema balun no estraga sasán. Iha Munisípiu Likisa, na'in 2 mate no lubuk ida kanek, estraga uma barak no ema liu 100 sai refujiadu. Iha Kapitál Dili ataka malu iha Beto, Comoro no ikus liu ataka malu, Segunda (23/09/19) iha área Ai-mutin ne'ebé rezultadu na'in 1 mate no na'in 2 kanek todan.

Tempotimor (Dili) – Ministru Interiór (MI) Interinu, Filomeno da Paixão de Jesus hamutuk ho komandu Polísia Nasionál Timor-Leste (PNTL) deskute kona-ba kondisaun no prioridade PNTL nian iha Governu daualu.

"Enkontru ne'e, atu fó hanoin ba malu atu hadi'a disiplina, hirarkia no prosedimentu seluk tan atu haforsa servisu Polísia ba oin di'ak liután. Ko'alia mós kona-ba polítika Governu primária ba iha Polísia Komunitária,” tenik Ministru Interiór Interino ne'e iha Quartel Jerál PNTL, Kaikoli, Kinta (26/09/19).

Governante ne'e afirma,  liuhosi diskusaun ne'e, ba futuru mak iha fallansu no ema seluk kestiona entaun presiza hadi'a.

MI afirma, ba futuru presiza halo revizaun ba estratéjiku ne'ebé mak PNTL iha, hodi bele kontrolu di'ak liután ba kazu sira.

"Ba futuru polítika Governu nian atu revé estratéjia PNTL nian para oinsá bele halo di'ak liután no bele iha dezibilidade ka kontrola di'ak liután, ba kazu sira ne'ebé akontese iha rai laran," nia afirma.

.