Informasaun kona-ba rezultadu teste ne’e hato’o husi Diretór Prizaun Bekora, João Domingos, iha Sabadu (19/10) liu husi ninia estatutu iha media sosial Facebook.

“Haktuir ezame médiku husi dotor Psikiater Gaspar Quintão katak suspeitu (arguidu CdJ) refere moras mental ho tipu Psikoza Agudo,” Diretor Prizaun ne’e hakerek.

Entretantu, prizaun Bekora simu ona arguidu CdJ iha loron Kuarta (16/10) tuku 18.00 OTL, hafoin prosesu interogatoriu dahuluk iha Tribunal Distrital Dili ne’ebé deside aplika medida koasaun prizaun preventive ba arguidu.

Ba desizaun ne’e, parte defeza husi arguidu konsidera la justu ho razaun failansu ba kazu tentativa soke aviaun ne’e iha parte seguransa aeroportu Komoro.

Iha interogatoriu dahuluk ne’ebé taka ba públiku ne’e, Ministériu Públiku akuza arguidu CdJ ho atentadu ba seguransa no transporte ne’ebé previstu iha Kodigu Penal Timor Leste artigu 186 no 210 ho ameasa pena prizaun tinan 2 to’o tinan 8.

Parte defeza preokupa ho kondisaun mental husi arguidu ho razaun durante interogatoriu dahuluk arguidu deklara katak Maromak mak haruka nia halo asaun refere.

“Arguidu nia kondisaun mental ladún di’ak no nia hatán arbiru de’it. Nia dehan tama iha aeroportu ne’e Maromak mak haruka, signifika ema ne’e ladún normal,” deklara advogadu Sebastião.

Molok ne’e, iha Segunda (14/10) tuku 13.30 OTL, CdJ uza motor Honda Revo ne’ebé la uza sapa matrikula hodi halai tama ba areador aeropotu liu husi postu 01.

CdJ ne’e halai ho velusidade maka’as husi parte lorosa’e hasoru aviaun Sriwijaya ne’ebé halai husi parte loromonu.

Maibé, akontesimentu ne’ebé la espera la konsege mosu tanba seguransa sira ne’ebé asegura area aeroportu ho lalais hapara asaun ne’e.

Seguransa sira konsege tebe monu CdJ no pilotu aviaun Sriwijaya mós konsege trava nune’e la akontese soke malu entre aviaun ho motor.

Tuir informasaun, aviaun Sriwijaya tula hela pasajeiru hamutuk na’in 100 ida. Entre pasajeiru ne’e iha mós Embaixadora Repúblika Hellénica, Costantina Coliau no Embaixadora Bosnia Herzegovina, Asmira Merdanovic Halilovic ne’ebé tuir planu sei hato’o karta kredensial ba Prezidente Repúblika Francisco Guterres Lu Olo iha Tersa (11/10).

Hafoin akontesementu ne’e, parte Ministériu Negósiu Estranjeiru no Kooperasaun (MNEK) ho lalais evakua kedan diplomata na’in rua ne’e.