Liuhusi karta ne'ebé www.tempotimor.com asesu, Governu Nova Zelándia halo ona evakuasaun emerjénsia ba sidadaun Nova Zelándia, Austrália, Pacific Island, inklui sidadaun Timor husi Wuhan ba Nova Zelándia.
"Governu Nova Zelándia kontente atu ajuda lori sai estudante timoroan na'in 17 husi Wuhan, iha Xina dadersan ida ne’e," dehan Governu Nova Zelándia, iha karta ne'e.
Iha karta ne'e mos esplika, bainhira estudante sira to'o iha Nova Zelándia, sira sei hela iha fatin izolamentu iha Whangaparaoa, Nova Zelándia durante semana rua molok fila mai Timor-Leste.
Antes ne'e, Ministru Negósiu Estranjeiru no Kooperasaun (MNEK) Timor-Leste, Dionísio Babo Soares hateten, estudante timoroan na'in 17, iha Xina, Sidade Wuhan, evakua ona ba Nova Zelándia, iha Kuarta (5/2), madrugada, tuku 02:00, oras Timor-Leste.
Desizaun ne'e governu foti hafoin virus Corona ne'ebé sai husi Sidade Wuhan, Provinsia Hubei, Xina, fó ameasa ba mundu tomak.
Nune'e, Organizasaun Saude Mundiál (OMS) hasai alerta ba mundu tomak atu halo vizilánsia ba virus ne'ebé oho ona ema barak ih Xina.
Totál ema mate tanba virus Corona, to'o Kuarta (5/2), hamutuk 492. Husi númeru ne'e mate na'in 490 iha Xina, ida iha Hong Kong no ida seluk iha Filipina.
Reportajen ikus liu hamutuk nasaun 26 konfirmadu hetan ona virus Corona. (*)