Antes Covid-19 Tama Timor Ema Mate Barak Ona Featured

Tempotimor (Dili) - Governu Timor-Leste preokupadu tebes ho Corona Virus Diseases 2019 (Covid-19), maibé antes moras ne'e tama iha nasaun ne'e mós timoroan barak mak mate ona iha ospitál.

Diretór Ezekutivu Luta Hamutuk, José Alves hateten, governu preokupa liu issue Covid-19, maibé la preokupa atu halo prevensaun ba moras ne'ebé hamate ema kada loron iha Ospitál Nasionál Guido Valadares (HNGV).

"Ita haree ospitál, iha mortuariu ne'ebá atu tau mate sira antrean, tanba fatin limitadu no ambulánsia atu tula mate sira ne'e menus. Kada loron mate tún liu mak na'in 10, ne'e la'ós Virus Corona", dehan nia, iha Salaun FONGTIL, Kaikoli, Sesta (6/3).

Nia hatutan, loloos governu tenke preokupa uluk ida ne'e, atu halo prevensaun para ema labele mate beibeik hanesan ne'e.

"Timor iha área ne'ebé di'ak (estratéjiku), tanba iha nasaun sira hanesan Indonézia, Austrália no Singapura, sira-nia teknolójia atu deteta Corona ne'e di'ak tebes, (entaun) oinsá atu tama mai Timor", tenik nia.

Nune'e, lalika fera ulun fali ba Covid-19, maibé tenke haree no tau atensaun atende uluk ba ema ne'ebé kada loron mate beibeik iha ospitál ne'ebá. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.