Ministra Saúde (MS) interina, Elia dos Reis, hateten sidadaun Italianu ne'ebé deskonfia hetan Covid-19, rezultadu amostra husi Austrália negativa.
"Ministériu Saúde simu fila hikas rezultadu negativu ba Corona Virus ka Covid-19", dehan nia, iha Palásiu Sinzas, Kaikoli, Tersa (10/3).
Nune'e, apela ba populasaun Timor-Leste tomak atu labele pániku ho informasaun sira ne'ebe espalla iha média sosiál relasiona ho Covid-19.
Nia hatutan, Ministériu Saúde kontinua esforsu hodi akompana situasaun no husu komunidade atu koopera no kolabora hamutuk ho espasu liña-ministeriál ne'ebe estabelese liu-husi primeiru ministru, atu halo servisu masimu hodi asegura no proteje populasaun tomak iha Timor-Leste.
"Ba populasaun ijiéne pesoál, fase liman ho sabaun beibeik, mear ka fani tenke taka ibun, mantein distánsia husi ema ne'ebe kustipasaun, tein na'an ka modo tasak mak han no atu komprementa malu labele kaer liman, maibe uza meus seluk atu komprementa malu", hakotu nia. (*)