Governu Husu PR Dekreta Estadu Emerjensia, Posibilidade TL Izola A'an

Aeroportu Internasional Nicolao Lobato, Komoro Dili Timor Leste Aeroportu Internasional Nicolao Lobato, Komoro Dili Timor Leste Foto File

Tempotimor (Dili) - Hafoin situasaun Pandemia relasiona ho kazu Coronavirus Disease 2019 (Covid-19) ba mundu tomak, Governu liuhusi Konsellu Ministru hasai deliberasaun ba Prezidente Repúblika atu deklara Estadu Emerjénsia.

 Tuir fonte www.tempotimor.com ne'ebé lakohi temi identidade hateten, bainhira Prezidente Repúblika dekreta Estadu Emerjénsia maka Timor Leste sei (lockdown) hodi taka pontu entrada sira. 

"Portuário, aeroporto no mos odamatan terrestre sei taka", dehan fonte nee. 

Tuir nia, medida ne'e presiza foti hodi asegura sidadaun timoroan sira no mós sei bele halo revizaun kada loron 15 ka fulan. 

Entretantu, liuhusi reuniaun KM prepara ona ezbosu hodi aprezenta ba Prezidente Republika atu bele konsidera posibilidade hirak ne'ebé Governu aprezenta kona-ba Estadu Emerjénsia.

Ministru Reforma Lejizlativa Asuntu Parlamentár (MRLAP), Fidelis Magalhães hateten, Konsellu Ministru solista ba Prezidente Repúblika hodi bele dekreta Estadu Emerjénsia relasiona ho pandemia ba kazu Coronavirus Disease 2019 (Covid-19).

Nia hatutan, Organizsaun Saúde Mundiál (OMS) mós deklara katak virus ne’e pandémika, ne'ebé hada’et ona iha kontinente hotu-hotu iha mundu tomak. 

Nune'e, Konsellu Ministru mós halo deliberasaun kona-ba medida imediata sira   ne’ebé Governu sei hola, ne'ebé balun sei hatuur iha rezolusaun no medida balun sei hatuur iha proposta, inklui Estadu Emerjénsia ne’ebé sei hato’o ba Prezidente Repúblika.

"Medida sira ne’e sei hato’o ba Prezidente Repúblika hodi bele promulga. Nia detallu ami sei hatudu hotu bainhira medida ne’e prontu ona no hatuur ona iha proposta ne’ebé Governu sei hato’o ba Prezidente Repúblika", dehan nia, iha Palásiu Governu, hafoin reuniaun Konsellu Ministru estraordináriu, Segunda (16/3). 

Globalmente ema hamutuk 169.531 maka hadaet ona husi Covid-19, nunee iha ema 6.515 maka mate no na'in 77.753 maka konsege rekupera. (*)

Rate this item
(0 votes)
Last modified on Tuesday, 17 March 2020 21:48
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.