Sidadaun Estranjeiru Husi Nasaun 147 Labele Tama TL

Mapa Virus Corona Mapa Virus Corona Foto Geogle

Tempotimor (Dili) - Governu hasai ona rezolusaun hodi bandu sidadaun husi nasaun hamutuk 147 labele tama mai Timor-Leste, liuliu sira ne'ebé afetadu ba moras Coronavirus Disease 2019 (Covid-19).

Rezolusaun ne'e sei hahú implementa husi loron, Kinta (19/3) ba oin. 

"Konsellu Ministru aprova rezolusaun atu bandu ka aplika interdisaun para bandu ema sira ne'ebe semana hat kotuk liu ba rejista ka tranzita ona iha país sira ne'ebé Organizasaun Mundiál Saúde (OMS) rekoñese hetan ona infesaun ba kazu Covid-19", dehan Ministru Reforma Lejizlativu Asuntu Parlamentár (MRLAP), iha Palásiu Governu, Kuarta (18/3).

Governante ne'e hatutan, ba ema nasaun sira ne'ebé husi OMS rekoñese ona rejista ba kazu infesaun Covid-19, sei la permite atu tama mai Timor-Leste liuhusi aviaun ka rai-maran. 

Maski nune'e, Ministru Fidelis hateten, la taka dalan ba timoroan ka estranjeiru ne'ebé hela iha territóriu Timor-Leste, maski agora viajen hela ba iha estranjeiru ka nasaun sira ne'ebe OMS rejista ona sai hanesan infesaun Covid-19.

"Kazu ne'ebé iha fundamentu duni relasaun ho defeza no interese nasionál bele autoriza estranjeiru tama mai, maibé presiza autorizasaun husi Primeiru Ministru", tenik nia. 

Nune'e, iha bandu ne'e mós la taka dalan ba transporte sira ne'ebé importa tama sasán nesesidade báziku sira liuhusi aereo, tasi no rai maran. 

"Kargu ba ai-han medikamentu la'o normál, maibé iha protokolu foun katak ró sira ne'ebé tama mai tenke para iha zona internasionál ne'ebé rezerva iha Portu Dili, nune'e evita sidadaun estranjeiru sira tama to'o laran", tenik nia. 

Fidelis dehan, sasán bele mai, maibé ema sira iha ró laran labele tun mai rai maran no bandu mos traballadór sira sai husi ba ró laran. (*)

 

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.