Task Force Orienta PNTL Vijilánsia Totál iha Fronteira Featured

Vice MS. Vice MS.

Tempitimor (Dili) - Vise Ministru Dezenvolvementu Estratéjiku Saúde, Bonifácio Maucoli dos Reis hatete, daudaun ne'e fronteira terrestre lockdown no orienta ona Polisia Nasionál Timor-Leste (PNTL) atu halo vijilánsia totál.

"Fronteira taka ona, ita la husik ona sidadaun Indonézia tama mas problema mak dalan ilegál, tanba ne'e koordena ho Komandante PNTL para Orienta Unidade Polisia Fronteira (UPF) atu taka dalan ilegál para ema labele tama, hotuhotu liuhusi portaun," dehan Bonifácio ba www.tempotimor.com via telemóvel, Sesta (20/3).

Antes ne'e, Komandante Jerál PNTL, Komisáriu Faustino da Costa hatete, polisia prontu asegura liña fronteira no taka dalan ilegál.

"Orientasaun komandu hato'o ona ba Unidade Patrollamentu Fronteira tantu mós komandu munísipiu tolu iha fronteira hanesan Bobonaru, Kovalima no Oekusi para atu asegura. Kuandu deteta duni iha ema balun tama ilegál maka orienta duni sira ba iha kuarentena," dehan Faustino da Costa, iha Palásiu Prezidensiál, Bairru-Pité, Kinta (19/3).

Entertantu, Timor-Leste deside lockdown, nune'e liña fronteira entre Timor-Leste Indonézia hahú taka, iha Kinta (19/3), hanesan parte prevensaun ba ameasa Covid-19 ne'ebé daudaun ne'e sai preokupasaun iha mundu. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.