"Kazu Primeiru Covid-19 deteta ona iha Timor-Leste, ema ne'e foin fila husi rai-li'ur, agora dadauk izola hela iha nia uma, nia kondisaun diak uitoan", dehan nia, liuhusi konferénsia imprensa, iha Palásiu Sinzas Kaikoli, Sábadu (21/3).
Ministra ne'e hatutan, Departamentu Viijlansia Epidemiologia investiga kedas kazu ne'e atu analiza risku ba públiku no ema ne'ebé kontaktu ho ema ne'e.
"Ema ne'e agora daudaun izola hela iha fatin adekuadu saúde nian, Departamentu vizilansia sei kontinua monitora ema ne'e loron-loron no ida ne'e la boot ba públiku", tenik nia.
Elia afirma, risku la boot ba públiku, tanba suspeitu ne'e informa kedas nia-aan ba pesoal saude, bainhira sente hetan sintomas Covid-19 no mos nia izola-aan kedas.
Nia hatutan, kazu seluk tan sei hein rezultadu husi laboratoriu, nune'e apela ba populasaun tomak favor boot kumpre nafatin meius sira ne'ebe orientasaun husi Organizasaun Mundiál Saúde (OMS).
Husu ba entidade hotu-hotu atu atensaun no servisu hamutuk hodi kontrola fronteira sira hodi kombate Covid-19.
Entertantu, parte ministériu saúde la fó sai identidade loloos ba suspeitu ne'ebe agora iha Timor-Leste sai ona rezultadu pozitivu ba moras Covid-19. (*)