Diretora Jeral Prestasaun Saúde MS, Odete da Silva Viegas hatete, ema estranjeiru ida ne'ebé pozitivu Covid hahú rekopera ona.

Nia hatutan, durante ne'e parte mediku sira la fó aimoruk ba pasiente hodi konsumu maibé halo de'it akompañamentu.

"Pasiente ne'ebé pozitivu ba corona virus ne'ebé hahú rekopera ona ne'e la konsumu aimoruk ida, ita observa de'it," dehan nia iha Sentru Konvensaun Dili, Domingu (29/03).

Nia dehan, daudauk ne'e pasiente refere la hatudu ona sintomas isin-manas no la mear ona.

"Nia sintomas hanesan isin-manas mós laiha ona, mear mós laiha," dehan Odete.

Nia afirma, durante ne'e parte mediku la fó aimoruk, tanba aimoruk ba Covid-19 laiha duni.

"Moras Covid-19 ne'e laiha aimoruk espesifiku, tanba ne'e ita halo tratamentu ba nia sintomas mais agora ne'e nia sintomas laiha ona, entaun nia hela par ita tenke halo tan teste dala rua tan," dehan Odete.