Print this page

Suspeitu Covid-19 na'in 2 Tama Fatin Izolamentu

Diretora Jeral Prestasaun Serbisu-Ministériu Saúde , Odete Viegas ko'alia ba Jornalista iha semana kotuk Diretora Jeral Prestasaun Serbisu-Ministériu Saúde , Odete Viegas ko'alia ba Jornalista iha semana kotuk Foto File

Tempotimor (Dili)-Diretora Jeral Prestasaun Serbisu-Ministériu Saúde (MS), Odete Viegas informa, daudauk ne'e suspeitu Covid-19 na'in rua mak izola hela iha fatin izolamentu.

Suspeitu na'in rua ne'e, nia hatete, Timor-oan sira ne'ebé foin fila husi rai li'ur no durante ne'e hela iha kuarentena ne'ebé governu prepara.

"(suspeitu ne'ebé izola) ... pur enkuantu na'in rua. Sira-nia kondisaun estavel," dehan Odete iha Sentru Konvensaun Dili, Kuarta (01/04).

Maske hatudu sintomas hanesan ho Covid-19, maibé Odete dehan, la signifika suspeitu na'in rua ne'e afetadu husi Covid-19.

"Ita iha sintomas isin-manas, mear entaun ita bele haree ona sintomas ba Covid-19 nian, maibé la signifika katak sintomas ne'e hetan kedas Covid-19," dehan nia.

Tan ne'e, nia husu ba públiku atu labele paniku bainhira ema ruma foin mai husi rai li'ur hatudu sintomas isin-manas, maear no seluk tan.

"Husu ba komunidade liu-liu sira hela iha karantina lable hakfodak karik kolega balu mai husi estranjeiru ho isin-manas, tanba dala-ruma nia kolen mak isin-manas ou bele mós moras seluk no isin manas bai-bain entaun bele rekopera fali," dehan nia.

Ba suspeitu na'in rua iha fatin izolamentu, nia hatete, mediku sira sei hasai amostra hodi halo teste atu bele hatene pozitivu Covid-19 ka lae.

"Kuandu pozitivu moras Covid-19 signifika izola ba Covid-19, se negativu ita husik," dehan nia.

Rate this item
(5 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items