Membru Jestaun Krize Rui Maria Araujo informa, iha fulan rua nia laran, hahú husi fulan Fevereiru, iha ema na'in 25 mak sai ona suspeitu ba Covid-19.
Maioria suspeitu Covid-19, Rui hatete, mai husi nasaun afetadu Covid-19.
Nia esklarese, husi númeru suspeitu 25 ne'e, na'in 23 mak nia rezultadu teste sai ona. Na'in 22 rezultadu negativu katak la afetadu husi Covid-19 no na'in ida pozitivu katak afetadu Covid-19.
Enkuantu na'in rua seluk, eis ministru saúde ne'e hatete, hala'o hela prosesu teste no ninia rezultadu sei sai iha loron hirak tuir mai.
"Iha boatus ne'ebé sirkula dehan katak kazu pozitivu (Covid-19) barak loos ona iha Timor, ne'e la loos, rezultadu mak hanesan ohin hato'o ne'e," dehan nia.
Iha oportunidade ne'e, Rui mós informa kona-ba mekanizmu hato'o informasaun relasiona ho kazu Covid-19 iha Timor-Leste.
"Regularmene bainhira iha rezultadu, ekipa tekniku husi ministeriu saude hato'o mai Sentru Integradu Jestaun Krize, depois ami sei anunsiu ba publiku," dehan nia.
Kona-ba nasionalidade husi suspeitu Covid-19 na'in rua ne'ebé daudauk ne'e izola hela iha fatin izolamentu, Rui dehan, nasionalidade la importante.
"Agora atu temi nia Timor-oan ou estranjeiru ne'e la importante. Importante mak hatene ema ne'e mai husi fatin afetadu i nia hatudu sintomas, tanba virus ne'e mai la fihir ema Timor ka estranjeiru, maibé nia mai kontajia ba ema hotu-hotu," dehan nia.