Print this page

Hasa'e Imunidade Isin, Uniku Dalan Kura Covid-19

dr. Sergio Lobo portavoz husi sentru Integradu Jestaun Krize ko'ala ba Jornalista sira iha sala Situasaun CCD (15/4) dr. Sergio Lobo portavoz husi sentru Integradu Jestaun Krize ko'ala ba Jornalista sira iha sala Situasaun CCD (15/4) Foto Isac Oliviera

Tempotimor (Dili)-To'o ohin loron espesialista sira seidauk konsege hetan aimoruk hodi bele kura Corona Virus Deasses 2019 (Covid-19), tan ne'e uniku dalan ba sira ne'ebé pozitivu ona atu bele rekopera mak hasa'e imunidade isin.

Portavoz Sentru Integradu ba Jestaun Krize (SIJK) Sergio Lobo hatete, pasiente Covid-19 na'in 8 ne'ebé hala'o hela tratamentu la hemu aimoruk, tanba to'o ohin loron seidauk iha aimoruk espesifiku ba Covid-19.

"Ida ne'e kan moras virus, virus ne'e laiha aimoruk espesífiku," dehan Lobo ba jornalista sira iha sala situasaun, Sentru Konvesaun Dili, Kuarta (15/04/2020).

Lobo dehan, nasaun barak koko ona aimoruk barak, maibé seidauk prienxe kritéria.

"Iha nasaun barak ne'ebé mak koko ona aimoruk antivirál, klorokin, no aimoruk oioin, maibé seidauk rekomenda ba kompra masal, tanba seidauk prienxe rekezitus," dehan portavoz ne'e.

Nia afirma, laiha aimoruk espesífiku ba Covid-19, tan ne'e parte saúde rekomenda ba pasiente sira atu deskansa barak no han hahan nutriente.

"Rekomendasaun ne'ebé ita fó ba sira mak deskansa barak liu, hemu vitamina, han hahan saudavel par sira-nia imunidade ne'e forte," dehan Lobo.

Ba daudauk ne'e, nia dehan, atendimentu ne'ebé parte saúde halo ba pasiente Covid-19 mak fó aimoruk bazeia ba moras ne'ebé kada pasiente sente.

"Se ulun moras ita fó aimoruk ulun moras nian, hanesan mós isin-manas, dada iis susar fó aimoruk, se posivel apoiu ho oxijéniu ka ventiladór par apoiu sira dada iis di'ak," nia hatete.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com