Portavoz Sala Situasaun Sentru Integradu Jestaun Krize Rui Maria de Araujo informa, profesor Portugues na'in rua iha Likisa mak halo teste. Rezultadu teste hatudu ida pozitivu Covid-19 no ida seluk indeterminadu.
Rui esplika, sidaduan portugues na'in 2 ne'ebé hanaran Sub-grupu TL ne'e hamutuk ho grupu ida ne'ebé fila ona ba Portugal ka bolu ho Sub-grupu P.
“Sub-grupu TL to'o agora laiha sintomas maibé tanba sira tama iha kriteria kontaktu besik ho sub-grupu P sira submete ba ezame laboratorial no rezultadu ikus konfirmasaun husi Royal Darwin Hospital hatudu ida pozitivu ho karga viral ne’ebé kiik-oan no ida indeterminadu,” dehan Rui iha Sentru Konvensaun Dili, Segunda (20/04).
Nia hatete, sub-grupu TL hala'o viajen iha periodu ne'ebé la hanesan ho sub-grupu P no sira la hela hamutuk.
Tuir Informasaun ne'ebe www.tempotimor.com asesu, grupu ida husi profesor Portuges sira too iha timor Leste iha semana segundu fulan Marsu tinan 2020.
"Ami Preokupa ituan ho kontamisaun lokal liu-liu ba labarik sira, tan ba keta halo profesor sira ne'e hetan ona moras wainhira sira nia viajen husi Portugal mai Timor. Hafoin to'o iha ne'e iha inisiu fulan marsu eskola seidauk feriadu nune'e aula sei iha," dehan Mariano Soares, sidadaun ida husi Likisa ne'ebe husi www.tempotimor.com .
