Rui dehan, Timor-oan ne'e hatudu sintomas respiratoriu aguda no daudaun ne'e kuarentena hela iha nia uma.
"Nia auto kuarentena iha uma de'it tanba nia la prienxe buat ida naran kritériu epidemolójika, maibé nia prienxe kritériu klíniku," dehan Rui iha Sentru Konvensaun Dili, Segunda (20/04).
Portavoz ne'e esplika, pesoal ne'e la dezenvolve sintomas Covid-19, maibé sintomas ne'ebé hatudu jeneriku.
"Nia iha sintomas ne'ebé hanesan ho Covid-19, maibé ne'e sintomas jenériku ka sintomas jerál ne'ebé bele hatudu mós infesaun respiratóriu aguda baibain, entaun ita foti de'it sample maibé nia iha uma nafatin," dehan nia.
Bainhira sidadaun ne'e halai, nia hatete, ekipa servisu vizilánsia epidemolójika ba kedas nia uma no hasai ona sample.
"Ekipa vizilánsia epidemolójika tuir kedas ba nia uma no halo entrevista ba nia katak nia laiha kontaktu, signifika laiha ema ne'ebé mai husi fatin risku ne'ebé iha kontaktu proximu ho nia, laiha mós ema ne'ebé konfirmadu tiha ona mak kontaktu ho nia," dehan Rui.
Maske nune'e, nia dehan, sidadaun en'e tenke hela metin iha uma, uza maskara, no kuidadu ijene pesoál to'o rezultadu analiza sai.