Likisa sai munisipiu ne'ebé hetan atensaun husi SIJK atu ninia komunidade sira bele hala'o teste hafoin profesor portugues na'in rua ne'ebé hela iha munisipiu refere konfirmadu pozitivu Covid-19.
Portavoz SIJK, Rui Maria de Araujo dehan, SIJK deside ona atu halo vizilánsia sentinela ba komunidade Munisipiu Likisa, liu-liu sira ne'ebé hela iha Likisa villa, atu bele hatene karik iha ona transmisaun lokal Covid-19.
"Enkuantu desizaun la'ós halo teste masal, maibé halo vizilánsia sentinela iha sentru saúde, ema hotu ne'ebé iha sintomas respiratóriu águda halo favór aprezenta aan," dehan Rui iha sala situasaun Sentru Konvensaun Dili, Kinta (23/04).
Rui apela ba komunidade Likisa atu aprezenta aan bainhira sente isin-manas, mear no inus-been.
"Hanesan apelu ida liu-liu ba Likisa vila, se ita-boot sira sente iha sintomas respiratóriu águda, hanesan isin manas, mear, inus been, halo favór ba iha sentru saúde par doutór sira haree par hasai espesiment hodi halo análiza," dehan nia.
Iha fatin ketak, Antonio da Silva Pinto, komunidade ida ne'ebé nia oan eskola iha eskola ne'ebé profesor portugues hanorin ba, husu atu halo teste ba estudante hotu-hotu.
"Ha'u hanoin katak presiza halo teste ba labarik hotu, ha'u la hatene ne'e doutór sira mak hatene, pois bele deskobre iha transmisaun tutan ba alunu sira, depois fahe tutan ba inan-aman sira ka lae, tanba ha'u mós hatene katak, antes hahú aula ne'e profesór sira halo enkontru ho inan-aman sira," dehan António ba tempotimor.com.