Molok ne'e, Portavoz SIJK, Odete da Silva Viegas informa, iha ema na'in 29 mak halo ona kontatu ba pesoal saúde ne'ebé pozitivu Covid-19.

Pesoal saúde ne'e konfirmadu pozitivu hafoin nia kumpre kuarentena no fila ona ba ninia uma.

"Ema ne'ebé durante ne'e nia (infermeiru) kontaktu hamutuk 29, kompostu husi familia inklui profesionál saúde sira," dehan Odete iha Sala Situasaun, Sabadu (25/04).

Ema na'in 29 ne'e, Odete dehan, ekipa servisu vizilánsia epidemolójika foti hotu ona sira nia amostra no hein atu submete ba kuarentena.

Entretantu, iha Domingu (26/04), Portavoz SIJK, Rui Maria de Araujo informa, familia no doutór sira ne'ebé halo kontaktu direta ho pesoál saúde ne'ebé konfirmadu Covid-19 izola iha idaidak nia uma.

"Tanba liu tiha ona loron 14 ka periodu inkubasaun, entaun sira hahú husi loron ne'ebé foti nia espesiment, liu ona loron 14, entaun ema ne'ebé kontaktu direta ho nia foti hotu ona espesiment, maibé sira ida-idak izola aan iha sira-nia uma," dehan Rui iha sala situasaun.