"Kontinua apelu ba mensajen horseik ba maluk sira ne'ebé fuma no hemu tua, di'ak liu para ona, atu evita estraga ita boot sira nia sistema imunidade. Husu ba ema hot-hotu atu mantein ita boot sira nia imunidade pesoál, han aihan ne'ebé saudável no halo ezersísiu fíziku, para ita bele hasa'e ita nia imunidade pesoál, tanba imunidade pesoál sai hanesan kilat di'ak liu, hodi hasoru Coronavirua", dehan Sergio Lobo, ba jornalista sira, liu husi konferénsia imprensa, Segunda ne'e, iha Sala Situasaun Sentru Konvensoens Díli (CCD) sigla iha portugés.
Eis-Ministru Saúde ne'e konsidera, maski Coronavirus ne'e perigozu tebes no bele hamate ema, inklui nia transmisaun lalais liu, maibé ho imunidade ne'ebé forte bele hamate rasik virus refere.
Durante iha Konferénsia imprensa nee, Sergio Lobo konitua husu ba públiku atu prátika nafatin medidas preventivas sira hanesan, distánsiamentu sosiál no fíziku, prátika ijene pesoál, hela hakmatek iha uma no bainhira sai uza luva.
Alende ne'e, apela ba públiku atu tau fiar ba Governu hodi lidera prosesu tomak kona-bá Covid-19, no kontinua husu ba ema hotu atu labele fiar informasaun husi fontes oi-oin, maibé tenki fiar de'it informasaun ne'ebé fó sai husi SJIK, kada tuku 15:00 otl.