"Hahú kedas loron 25 Abril, ne'ebé detekta kazu pozitivu ikus ba Covid-19, liu ona loron 45 mak ita seidauk detekta kazu konfirmadu foun iha Timor Leste," dehan Portavoz SIJK Dra. Odete da Silva Viegas iha sala situasaun CCD ba jornalista sira, Segunda (08/06)
Atuál Diretora Jerál Prestasaun Saúde (DJPS) katak, iha faze estadu emerjénsia daruak, Ministériu Saúde (MS) hamutuk ho SIJK halo ona servisu sentinela surveillance ba teritóriu tomak hodi foti amostra ba sidadaun sira ne'ebé iha respiratóriu águda.
"Iha faze estadu emerjénsia dahuluk no daruak ita konsege kontein, detekta, izola no trata, maibe iha EE faze daruak, MS servisu hamutuk ho SIJK halo servisu ida iha teritóriu tomak hanesan sentinela survilence no foti amostra ba suspeita sira, ne'ebé hahú iha loron 5 maiu to'o 15 maiu 2020, grasa ba Nai Maromak, tanba husi servisu rua ne'e rezultadu hotu negativu," dehan Odete
Nia mós dehan, suspeitu ne'ebé durante rekolla amostra no iha sentinela survilence ne'e pursentu 100% rezultadu negativu.
"Servisu sentinela survilence ne'e ba ema hotu-hotu ne'ebé mai iha prosesu triajem iha ospitál referál, Ospitál Nasionál inklui sentru saúde sira iha Timor Leste laran tomak, to'o ohin (08/06) konsege rekolla sidadaun 865 nia amostra iha servisu sentinela survilence nian, nomós ba suspeitu hamutuk 64 inklui ho kazu ida iha Suai ne'ebé rezultadu negativu," nia dehan
Entretantu sidadaun sira ne'ebé sei hein rezultadu teste laboratóriu hamutuk 38, sidadaun sira ne'ebé sei iha karantina hamutuk 58 ne'ebé barak liu iha munisípiu Bobonaru, Covalima no Raeoa, entretanti sira ne'ebé sei iha auto karantina hamutuk 56 no sira ne'ebé liu ona loron 14 iha karantina no auto karantina hamutuk 2397.