"Sidadaun ne'ebé fila husi rai-li'ur, mezmu timorense no hatudu rezultadu di'ak mós sira tenke tama kuarentena, tanba sira mai iha dalan bele kontaminadu," dehan Vise-Ministru Saude, Bonifacio Maucoli dos Reis, hafoin reuniaun Konsellu Ministru, iha Palásiu Governu, Kuarta (22/07).
Governante ne'e dehan, kuandu sira husi estranjeiru mai maski barak maibé, tenke kumpre loron 14 iha kuarentena, se fatin la sufisiente bele aluga tan otél sira atu sira bele kumpre.
"Sira ida mai uluk kompleta ona no agora ita haruka fila ona ba uma, sira mai tan tama nafatin, nune'e duni susesivamente," tenik nia.
Vise-Ministru afirma, Izolamentu ne'ebé prepara ona iha Tasi-Tolu daudaun atinzi ona 50% no izolamentu Lahane atinzi ona 40%.
Nia dehan, preparasaun ba fatin kuarentena iha Batugade atinzi ona 100%, nune'e bele utiliza ona ba sidadaun sira ne'ebé tama husi fronteira.
"Kuarentena Tasi-Tolu iha kama 236 ne'ebé disponivel hela ba konfinamentu obrigatoriu sira," nia salienta.
Razaun, ema ne'ebé fila husi estranjeiru tenke kumpri nafatin loron 14 iha kuarentena hodi evita korrente moras Covid-19 iha rai-laran tanba, kazu Covid-19 iha nasaun viziñu sira kontinua sa'e no ema mate nafatin. (*)