Iha ninia estatutu pajina Facebook ho naran Aurelio Guterres, ne’ebé públika iha Tersa (04/08) maizumenus tuku 10 resin, membru SIJK ne’e informa kona-ba kazu pozitivu foun Covid-19 iha TL.

“Timor-Leste tenke alerta masimu tanba dala ida tan ita iha fali ona kazu pozitivu Covid-19 foun,” Aurelio hakerek iha ninia estatutu ne’ebé hetan ona reasaun no komentariu ema liu 100.

Bainhira hatan komentariu balun ne’ebé husu kona-ba kazu foun ne’e mosu iha ne’ebé, Aurelio responde katak kazu ne’e mosu iha Dili.

“Kazu pozitivu iha Dili,” nia hakerek.

Liu tan, Aurelio mós informa katak kazu pozitivu ne’e nu’udar kazu importadu.

“Kazu Covid-19 importadu,” dehan Aurelio hodi hatan ba preokupasaun utulizadór facebook balun.

Entretantu, molok ne’e Timor-Leste rejista kazu pozitivu Covid-19 dahuluk iha 21 Marsu 2020, no kazu ikus liu rejista iha 24 Abril 2020, ho total kazu konfirmadu na’in 24 no provavel na’in 4. Hafoin hala’o tratamentu, iha 15 Maiu, SIJK deklara pasiente konfirmadu Covid-19 no provavel rekuperadu hotu ona.

Maibé ikus, mai, hafoin Konsellu Ministru deside hato’o pedidu estadu emerjensia ba dala haat ba Prezidente Repúblika, iha tan kazu pozitivu Covid-19 foun ne’ebé parte kompetente sira deteta.