Print this page

Pasiente Covid-19 Tama TL Hamutuk Ho Ema 110

By August 04, 2020 2362
Kuarentena Tasi Tolu (4/8) Kuarentena Tasi Tolu (4/8) Foto Januario J. Varela

Tempotimor (Dili) - Hafoin loron 50, Timor-Leste deklara livre husi Covid-19, ikus mai mosu tan kazu pozitivu Covid-19. Kazu ne’e nu’udar kazu importadu, ne’ebé lori husi timoroan ida ne’ebé foin fila husi Indonezia.



Informasaun ne’ebé tempotimor.com asesu, timoroan ida, mane ho idade tinan 46, ne’ebé fila husi Java Sental, Indonézia, konfirmadu pozitivu Covid-19.

Timoroan ne’e hala’o viajen husi illa Java mai Kupang iha 21 Jullu 2020. Hafoin to’o iha Kupang, nia kontinua hala’o viajen ho karreta marka Avansa hamutuk ho ema na’in neen, kompostu husi labarik ida, feto ida no mane haat, inklui kondutór.

Hafoin to’o iha fronteira Timor-Leste, iha 22 Jullu, nia hamutuk ho timoroan seluk, na’in 105, tama liu husi dalan legal. Enkuantu na’in 6 seluk, tama husi dalan ilegal. Nune’e, totál timoroan ne’ebé tama iha Timor-Leste iha loron hanesan, hamutuk na’in 111.

Husi Batugade, ema ne’ebé identifika pozitivu ne’e la'o hamutuk ho ema na’in 110 halo viajen mai Dili. Entre sira ne’e, na’in 83 tama iha kuarentena obrigatoriu, iha Tasi-Tolu no na’in 28 hala’o auto-kuarentena.

Hafoin tama kuarentena durante loron 8, iha 30 Jullu, ekipa saúde foti sira-nia amostra hodi halo teste.

Ikus mai, iha 3 Agostu 2020 kalan, rezultadu teste sai no hatudu katak ema na’in ida, entre na’in 83 ne’ebé kuarentena iha Tasi-Tolu, pozitivu Covid-19.

Informasaun ne’ebé tempotimor.com asesu, ekipa saúde halo hela preparasaun hodi tula pasiente ne'e ba fatin izolamentu Vera Kruz.

Entretantu, ba ema na’in 82 seluk ne’ebé tama kuarentena hamutuk ho pasiente ne’e, loloos livre iha Kuarta (15/08), maibé tanba identifika kazu pozitivu ida, sira tenke mantein iha kuarentena durante loron 14 tan. (*)  

Rate this item
(0 votes)
Last modified on Tuesday, 04 August 2020 19:11
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com