Bazeia ba rezolusaun governu númeru 32/2016 kona-ba melloramentu jestaun lixu iha Munisípiu Dili, maka MAE iha polítika atu halo jestaun ba lixu iha Tibar. Nune'e, tuir planu tinan 2020-2021, Tibar sei nakfilak ba fatin lixu ho standar internasionál.

Estudu ba projetu ne'e halao ona iha dentru tinan 2016-2017 ho objetivu atu Tibar ne'ebé fatin rekolla lixu hadi'a ka reabilitasaun fali.

Atu nune'e, lixu ne'ebé atu halo ateru kontroladu tama iha Tibar, seluk ne'ebé green ways bele halo fali ba composting plant, ho lixu balun ne'ebé bele utiliza ba recycle.

"Governu investe purvolta tokon US$ 20 tanba ita mós lakohi governu hasai osan, mas laiha sustentabilidade ba projeitu ne'e. Governu planeia ho standar internasionál, atu nune'e dura to'o tinan naruk," dehan Diretora Ajénsia Planeamentu Munisípiu Dili, Emiliana Soares ba www.tempotimor.com, iha nia knaar fatin Matadoru, Kinta (13/08).

Emiliana esplika, tuir dezeñu atu loke ba tenderizasaun purvolta área ektare 23 utiliza halo jestaun lixu. Ne'ebé fahe ba halo adubu nian, no lixu ne'ebé sei utiliza fali, ezemplu plástiku ne'ebé halo fali recycle.

"Tender ne'e ICB (International Competitive Building) nian, daudaun ne'e kompañia seidauk iha mais foin tama iha prosesu pre bit meeting, tanba ne'e ita sei haree kompañia joint venture no sei fó oportunidade ba kompañia lokál para joint venture ho kompania internasionál sira," dehan Emiliana.

Entertantu, Tibar ne'ebé fatin lixu daudaun ne'e kuaze lixu tomak butuk hamutuk no kahur malu tanba seidauk iha manajementu lixu tuir kategória lixu ho loloos.(*)