Print this page

Traballadór Timoroan ida Mate iha Austrália

By January 10, 2021 24834
Timor oan sira ho triste hamriik hare polisia australiane'ebe hala'o hela sira nia kna'ar iha fatin kareta baku fila hodi hamate Timor Oan ida iha Tasmania Timor oan sira ho triste hamriik hare polisia australiane'ebe hala'o hela sira nia kna'ar iha fatin kareta baku fila hodi hamate Timor Oan ida iha Tasmania Foto Televizaun ABC

Tempotimor (Dili)- Mane Timoroan ida ho tinan 25, ne'ebé tuir programa Seasonal worker no serbisu iha toos ida iha Norte Tasmania, Austrália hetan asidente tráfegu no mate.

Mate isin traballadór Timoroan ne’e hetan iha dadersan Domingu, tuku 06.00, iha fatin natar Deloirane, territóriu Tasmania nian.

Embaixadora Timor Leste ba Austrália, Inês Almeida, konfirma traballadór ne'ebé mate ne'e ho naran Tomás Pereira.

“Sim, horisehik lokraik ami ba vizita traballadór sira iha fatin ne'ebé nia (matebian) mós serbisu ba ne'e no sira dehan nia ba vizita nia kolega sira iha fatin seluk. Nia kaer karreta mesak no akontese wainhira nia fila mai maka karreta baku-fila, nia mate fatin ne'e ohin dadersan hetan,” dehan Embaixadora Inês Almeida ba www.tempotimor.com liuhosi telemovel.

“Polísia ohin dadeersan maka foin hetan nia iha fatin ne'ebé la dook husi fatin nia serbisu ba ne'e. Mate isin lori Ona ba mortuáriu no sira sei halo investigasaun. Polísia ko'alia ona ho ha'u no dehan nia(matebian) la lanu no nia iha karta kondusaun ou lisensa internasionál lori karreta,” nia hatutan.

“Nia isin mate sira lori tiha ona ba ospitál iha Hobart kapital, Tasmania nian atu halo investigasaun. Agora hein hela Karik família fó autorizasaun atu halo autópsia. Maibé sé família la fó autorizasaun entaun sira sei la halo autópsia,” ines dehan.

Inês hakfuir, Tomás Pereira husi munisipiu Bobonaro, ema ida-ne'ebé serbisu badinas no serbisu ho nonok no nia ema di'ak tebes.

“Toos na'in sira agora kontaktu ho asuransi, tanba traballadór hotu- hotu iha asuransi nunee asuransi mak sei haree oinsá lori mate isin fila fali ba Timor,” dehan inês.

Dezde horisehik Embaixador Inês Almeida ho Primeiru Sekretáriu Embaixada TL iha Canberra, Samuel Soares hala'o vizita ba Tasmania hodi hasoru malu ho trabalhadór Timoroan sira-ne'ebé serbisu iha- ne'ebá. (*)

Rate this item
(4 votes)
Last modified on Monday, 11 January 2021 05:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items