Tuir família husi vítima na'in-rua, Maria Gomes Barros deklara, nia alin na'in- rua horisehik di'ak hela, maibé ohin sira hetan moras ida-ne'e, tanba haan na'an karau no na'an fahi ne'ebé simu husi kompañia Leader, Aimutin.

"Sira na'in-tolu mak hela hamutuk iha kos ida, horisejik ha'u ba vizita sira, sira dehan sira simu ona cesta bázika, só informa de'it katak, sira haan na'an karau no na'an fahi ne'ebé mak sira eskalda dala-rua, depois sona no sira haan iha horikalan, no horikalan la akontese kedas, ohin dadeer mós sira hamanas hodi matabixu, depois ohin antes de meudia ne'e sira muta barak, no lanu," alega nia iha Sentru Saúde Komoro, tersa (12/1).

Hafoin moras ida-ne'e, nudar bin husu ba sira maibé lahatene ninia impaktu ne'e saida.

"Sira dehan konsumu hahaan maka hahaan ida horisehik sira simu ne'e, foos mós sira tein foos ida horisehik sira simu ne'e no modo mós sira halo de'it na'an karau no na'an fahi ne'ebé sira simu", nia deskonfia.

"Sira hakarak simu haan hahaan ne'ebé estadu fó ne'e, mais sira-nia hahaan iha hela, la'ós hahaan laiha, tanba konsidera katak governu mak fó ba kompañia, kompañia fahe ba povu sira," dehan nia.

Nia haktuir, problema ida-ne'e nu'udar família sei la halo keixa hodi problema ne'e sai boot , maibé sujere de'it ba governu no kompñia sira karik fahe cesta bázika tenke haree didi'ak karik sasán ne'ebé laiha kualidade entaun lalika obriga atu fahe ba komunidade sira tanba prezudika fali sira-nia saúde.

"Ha'u nu'udar família sei la halo keixa, tanba agora ha'u-nia alin komesa di'ak ona, ohin nia grave hotu, isin sira maten hotu, mais agora komesa fase ona ho aimoruk no soru sira-ne'e, ne'ebe so husu Ba oin karik fó ba kompañia, favór ida haree didi'ak antes atu fahe," nia rekomenda.

Nia dúvida, se kuandu moras ida-ne'e baibain de'it entaun na'in ida de'it, maibe la'os uma laran ida moras hotu kedas, realidade agora sira moras hotu tanba sira komsumu hahaan ne'e hahú horikalan to'o ohin dadeersan.

Entretantu to'o nutisia ne'e públika, iha pajina www.tempotimor.co, jornalista sira seidauk bele halo konfirmasaun ho doutor inklui pesoál saude sira, tanba sira laiha fatin.(*)