Portavós Komandu Jerál PNTL, Superintendente Xefe Arnaldo Araújo informa, sidadaun na'in-13 ne'e iha dokumentu ne'ebé kompletu, maibé tanba númeru kazu ema mate iha nasaun viziñu Indonézia hahú sa'e, tanba Covid-19, nune'e obriga sira hakat mai área TL ho dalan ilegál.
"Ohin, ha'u hatete ona, husi dia 29 dezembru 2020 mai to'o dia 12 ne'e hamutuk ema na'in-13, ne'e mak alísta relatóriu mai iha komandu jerál," Nia ko'alia iha Kaikoli, kinta (14/1).
Nia hatutan, ema sira- ne'ebé tama ilegál, mai ho mistura, balu estudante, balu negosiante, balu ema normál, balu halo tratamentu iha li'ur, balu foin fila mai, ida ne'e maka UPF sira halo relatóriu mai.
Maske hakat liuhusi dalan ilegál, maibé sidadaun sira-ne'e mós ba aprezenta-aan iha postu polísia UPF ne'ebé destaka iha liña fronteira no membru sira mós orienta sira halo tuir nafatin regra ne'ebé estabelese husi Organizasaun Mundiál Saúde (OMS) hanesan uza maskára, luvas, mantein distansiamentu sosiál.
"Membru sira lori ema sira-ne'e mai iha imigrasaun Batugede depois-de-ne'e fó fali ba iha ekipa Covid-19 nian ne'ebé destaka iha Motaain, no oras ne'e daudaun prosesu ba ema sira-ne'e la'o daudaun hela, buat hotu la'o tuir ita-nia regra, prosedimentu sira-ne'ebé iha", dehan nia.(*)