Vise-Kordenadóra Forsa Tarefas Prevensaun no Mitigasaun Covid-19, Odete da Silva Viegas afirma, iha fulan janeiru kazu denge akontese ema na'in 183 mak moras, eh rezulta ida mate, no fevereiru ema ne'ebé afeita ba moras denge na'in 154.
"Ita boot sira hatene katak pandemia mosu globalmente, maibe iha ita nia rain iha mós moras ne'ebé dadaun ne'e bolu ita nia atensaun mak moras denge", dehan Odete hafoin Konferénsia Imprensa iha Sentru Integradu Jestaun Krizi (SIJK), merkadu lama, sabadu, (20/02/21).
Ema ida ne'ebé moras no mate ona ba denge ne'e, husi hospital referal munisípiu manufahi, feto ho idade 3.
"Husi 337 kazus ne'e okupa numeru boot iha munisípiu 4 maka, Dili, Baukau, Bobonaru ho Ermera no entre kazu ne'e iha mate na'in 1 labarik feto ho idade 3 anus, kazu ne'e referal husi munisípiu Manufahi mai iha Dili", haktuir Odete
Haree ba situasaun moras denge hada'et iha rai laran maka, husu nafatin no apelu ba komunidade sira atu hamos ida-idak nia fatin hodi evita.
"Udan agora tun ita hotu-hotu presiza atu hadi'a higene ambiental, nune'e profisionál saúde sira halo sira-nia servisu, maibe partisipasaun sira husi familia, komunidade atu nafatin hatene prevensaun moras denge ne'e rasik", Odete Alerta
Kazu moras denge ne'ebé durante fulan rua nia laran hada'et ba ema na'in 337 ne'e, maioria husi munisípiu Dili, Baukau, Bobonaru, no Ermera.
Munisípiu ne’ebé kazu moras dengue numeru aas mak hanesan, Dili na'in 204 ho pursentu 60.5, Baukau na'in 56 ho pursentu 16.6, Bobonaro na'in 23 ho pursentu 6.8, Ermera na'in 13 ho pursentu 3.9, Manatutu na'in 10 ho pursentu 3.0, Manufahi na'in 8 ho pursentu 2.4, no ida mate, Kovalima na'in 8 ho pursentu 2.4, Ainaru na'in 7 ho pursentu 2.1, no Likisa aumenta Lautem na'in 4 ho pursentu 1.2.
Kazu dengue bazeia ba klasifikasaun mak, mane na'in 167 ho pursentu 49.6, no feto na'in 170 ho pursentu 50.4.
Kazu dengue haree ba klasifikasaun idade ne’ebé afeta liu mak hahu husi tinan 5 to'o 14 hamutuk na'in 127 ho pursentu 37.7, no tun liu mak ema ho tinan 50, na'in 6 ho pursentu1.8. (*)