“Husi teste PCR ne'ebé halo, hetan tán pozitivu ida, mane, ninia kabén konfrimadu nu'udar kazu foun, loron rua liubá,” Eis Primeiru Ministru VI Governu Konstitusionál ne’e ko’alia iha Sala Situasaun Sentru Integradu no Jestaun Krize (SIJK), iha Sentru Konvensaun Dili (CCD), kinta(25/2)
Nia informa, husi dadus ne'ebé rekolla no análiza halo ba istória kontaktu husi kazu foun ida-ne'e.
“Kazu foun ida ohin, mane ho idade tinan 69, hela iha aldea Klauhalek, sintomátiku, nia gasta maiór parte husi nia tempu iha to'os no hakiak karau fatin, besik baliza Indonézia, suku Lookeu, Postu Administrativu Tasi Feto barat, Munisípiu Belu,” dehan nia.
Eis Ministru Saúde ne’e esplika, rezultadu PCR hatudu katak CT (Cycle Threshold) valór 40, signifika nia iha faze rekuperasaun. Ida-ne'e hatudu katak nia hetan kontájiu, maizumenus entre semana rua to'o semana tolu liubá.
"Ekipa vijilánsia epidemiolójika ho laboratóriu husi nível nasionál, munisípiu Covalima nomoos Sentru Saúde Fatumea, hamutuk ema na'in-20, oras ne'e daudaun nafatin hala'o restreiu ba kontaktu aira hotu,” nia relata.
Dadus jerál covid-19 hatudu katak kazu konfirmadu 1, kazu rekuperadu 1 (husi RAEOA), kazu ativu 21 no ema tama husi fronteira husi horisehik mai ohin liu dalan regulár hamutuk 17, irregularidade na’in-4. Ema hirak ne’e tama kuarentena.
Eis Primeiru Ministru ne’e subliña, kazu foun konfirmadu na'in-6 ne'ebé horisehik halo viajen husi Fatimea mai Dili, to'o iha Vera Cruz 11:45 kalan no sira iha kondisaun ne'ebé kolen tanba halo viajen naruk, maibé kondisaun saúde agora estável hela.(*)