"Ministériu Saúde hamutuk ho parseiru sira, ajensia sira, doadore sira, Ministériu relevantes sira no ami konvida mós Primeiru Ministru, Taur Matan Rua atu bele hola parte iha resepsaun vasina ka simu vasina iha Areoportu Nicolau Lobato iha loron segunda (05/04) iha oras tuku 13:00 otl”, dehan Ministra liuhusi konferensia imprensa iha Kampung Alor-Sames, kinta (01/04)

Vasina AstraZeneca ne’ebé foin bele mai, tanba dalaruma ho moras sira hanesan pandamia, ema fó atensaun liuba nasaun sira ne'ebé afetadu, nasaun sira ne'ebé ema mate barak, tanba nasaun Timor-Leste sei bele kontrola.

"Ita iha kazu, maibé kazu importadu la signifika katak, nasaun sira la tau matan ba ita lae, maibé nasaun sira haree mós ba ita-nia maluk sira ne'ebé mak afetadu tebtebes, iha parte seluk ita mós tauk moras ne'e atu kona ita, tan ne’e ita hakarak teb-tebes atu hetan vasina”, dehan Ministra.

Tanba nasaun hothotu ne’ebé hakarak hetan vasina maibé liuhusi fasilidades Covid-19, oinsá atu ema hothotu hetan vasina, nasaun riku, nasaun kiak, ema iha oportunidade hanesan atu hetan vasina ne’e.

"Entaun ita mós iha oportunidade ne'e e, ohin lorokra'ik ita hamutuk iha ne'e, ha'u espera katak ita-nia mídia sira hatene saida mak fasilidade covid imi bele fó informasaun ne'ebé di’ak, apoiu ida ne'e mai duni iha ita”, afirma Odete.

Atrazu vasina ne'e la'ós de'it Timor-Leste, no iha mós nasaun barak ne'ebé seidauk hetan vasina, maibé espera vasina AstraZeneca bele mai duni..(*)