"Ha’u hatete ba populasaun bainhira governu hahú vasinasaun ita buka hothotu simu e meus vasina la’ós sufisiente ba proteje-an husi Covid, mesmu ho vasina ona tenke uza máskra, distansiamentu nafatin”, dehan Horta iha Sentru Saúde Formosa, kuarta (07/04).
Hafoin vasina nia parte sente normal no antes simu vasina Ramos halo konsultasaun ona ho ema barak tantu rai laran no liur inkluidu Timoroan ne'ebé vasina ona.
"Ha’u ko’alia ho ema barak iha mundu ne'e, la’ós de’it iha ne'e. Ha’u ko’alia ho kolega barak iha Inglaterra kona-ba vasina. Vasina ne’ebé sira simu iha Inglaterra ida mak ne'e duni , 30-resin millaun simu ona vasina iha Inglaterra”, dehan Ramos.
Haree ba efeitus husi vasina mak iha reasaun bainhira remata vasina, hanesan isin manas, moras maibé nia parte konsidera ne'e normal bainhira ema simu vasina.
Ministra Negósiu Estranjeiru no Kooperasaun, Adaljiza Magno espresa nia sentimentu kontente no husu atu públiku labele dúvida ho informasaun ne'ebé lansa dehan vasina AstraZeneca.
"Sente di’ak hela, normal pois sente kontente tanba hetan ona vasina, ha’u sente seguru liután, purtantu ha’u kontente los nune'e enkoraja hothotu bele simu vasina ne'e tanba ne'e proteje ita”, dehan Adaljiza.
Husu atu kestaun saúde tenke tau konfiansa ba profesiónal saúd, doutor no sientifiku sira, inklui OMS tanba entidade hirak ne'e mak loroloron atende, produz kestaun saúde.
"Ema atu politiza oinsá mós, ita tenke fiar katak vasina ne'e seguru. Ha’u la fiar katak buat ne'ebé la seguru sira fó atu sona ba ita-nia isin”, afirma Adaljiza.
Entertantu, Primeiru Ministru, Taur Matan Ruak ne’ebé oferese-an sai primeiru ema ne'ebé hetan vasina Covid-19 inklui membru governu, konviksaun religioza no diplomata sira.(*)