Print this page

SIJK Rejistu Kazu Covid-19 Pozitivu Foun 70

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, (CIGC-SS), Rui Maria de Araújo Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, (CIGC-SS), Rui Maria de Araújo Foto arkivu

Tempotimor (Dili) - Sentru Integradu Jestaun ba Krize (SIJK) iha loron domingu (18/04) rejistu tan kazu foun covid-19 na'in-70 ne'ebé kompostu husi munisípiu Dili na'in-65, husi munisípiu sira seluk na'in-5 no kazu rekuperadu na'in-21.

"Dadus jerál iha Timor-Leste tomak, totál kazu konfirmadu kumulativu (sura husi tinan 2020) 1306, kazu detetatu foun ne’ebé relata iha loron 18 fulan-abril 2021na'in-70 (iha Dili 65, iha Munisípiu seluk 5), kazu rekuperadu na'in-21 no totál kazu ativu loron 18 fulan-abril 2021 na'in-641”, dehan Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, (CIGC-SS), Rui Maria de Araújo, liuhusi Komunikandu Imprensa ne'ebé www.tempotimor.com asesu iha loron domingu (18/04)

Husi totál kazu detetadu foun iha loron 18 fulan-abril iha mane 46, feto 24, asintomátiku 64 (91,4%), no sintomátiku 4.

Nune'e totál kazu detetadu foun, 54 (77%) mak deteta tanba halo teste ho razaun atu halo viajen/ka halo ona viajen ba Munisípiu hafoin deteta pozitivu.

Maske nune’e, sira ne’ebé rezultadu teste pozitivu, sira-nia hela fatin, iha Dili, iha duni cluster sira ne’ebé iha kazu detetadu barak.

"Husi horiseik mai ohin, hamutuk hotu Laboratóriu Nasionál Saúde halo 983 testes PCR, ho detalles hanesan tuir mai, vijilánsia sentinela 18, Rastreiu ba kontaktu (Contact tracing) 17, Rastreiu Aleatoriu (Random Screening) 362, Viajen sai husi serka sanitária Munisipiu Dili 566, Viajen internasionál 20 no Follow up iha quarentena”, informa Rui.

Iha kazu detetadu sintomátiku lijeiru balun, oras ne’e iha fatin izolamentu, mak keixa hanesan parte husi sintomas, susar/la bele atu horon morin ka dois. Ida ne’e parte husi sintoma Covid-19.

Maibé husu atu labele pániku, tanba maioria ema ne’ebé hetan sintoma hanesan ne’e, sei rekupera fali ninia kapasidade atu horon sasan.

"Kazu grave ne’ebé iha Vera Cruz, nafatin uza ventilador & aimoruk balun tuir protokolu ne’ebé Timor-Leste adopta", dehan Rui. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items