Diretór Ezekutivu no Prezidente Konsellu Diretivu SAMES, Santana Martins, hatete sasán sira ne'ebé estragu husi inundasaun mak iha item 5 ka 6.
Ekipamentu no matérial sira ne'ebé at hanesan, médikamentu, protesaun pesoál, nutrisaun, planeamentu famíliar ho malaria, inklui ekipamentu médiku seluk.
"Buat ne'ebé mak agora ami tenke halo mak, depois re-inspesaun, ami sei halo destruisaun, hanesan impaktu ne'ebé iha, ida mak, ita-nia vasina rota-virus, ne'e mós estragu, tanba impaktu husi eletrisidade mate", dehan nia ba www.tempotimor.com iha kna’ar fatin armajen SAMES Kampun-Alor, tersa (20/04).
Tanba ne'e, dadaun organiza hela rekursu atu halo re-kontajiu hodi identifika hira mak sei di'ak, no at ona.
"Agora dadauk ami halo fali re-verifikasaun dala ida tán, antes ita deside ida ne'ebé bele uza ou la uza", afirma nia.
Maske matérial sira balun at, maibé hirak ne'ebé sei di'ak, sufisiente hela, tanba iha barak mak konsege salva hela, nune'e Stock SAMES la mamuk. (*)