Tuir kronolójia, iha loron kinta (27/04) liubá, vítima FdR hetan asidente ho motorizada iha área Fatuhada, hodi rezulta kanek iha liman ho ain.
Hafoin asidente, família sira lori kedan nia ba halo tratamentu ba nia kanek sira, inklui halo mós "cheeck up" ba vítima, maibé la hetan moras ruma, nune'e médiku sira haruka fila ba uma.
Bainhira iha loron sesta(28/04), vítima ho kondisaun oin halai no munu derepente iha uma, nune'e família sira tula ba Hospital Nasional Guido Valadáres (HNGV) hodi leno, no rezultadu deteta moras iha ulun.
Nune'e, médiku sira halo mós teste swab ba vítima, ikus mai rezultadu pozitivu, hodi transfere kedan ba izolamentu Vera Cruz.
Informasaun ne'ebé www.tempotimor.com asesu katak, dadaun ne'e, parte família halo hela koordenasaun ho ekipa Sentru Integradu Jestaun Krize-Sala Situasaun (SIJK-SS), hodi ko’alia kona-ba ba oin, maibé tuir planu, loron segunda (03/05), oras dader, SIJK sei entrega mate-isin ba família hodi hala'o serimónia funerál tuir kultura família nian, maibé nafatin kumpri regra sira husi protokolu MS ho OMS nian.
Entretantu, matebian FdR (26) orijen husi Postu administrativu Watulari, Munisípiu Vikeke, maibé dadaun ne'e hela iha Maskareñhas, Kaikoli, Dili. (*)