Tempotimor(Dili)-Ministru Asuntu Parlamentar no Komunikasaun Sosiál (MAPKomS), Francisco Martins Jerónimo, solidariza funsionária na'in-22 husi Grupu Média Nasionál (GMN) ne'ebé dadaun ne'e iha sala izolamentu tanba pozitivu covid-19.
Funsionáriu hamutuk na'in-21 ne'ebé pozitivu Covid-19 ne'e, kompostu husi feto na’in-neen (6), no mane iha sanulu-resin-lima (15).
Pasiénte sira ne’ebé detetadu pozitivu hafoin teste swab iha semana ne’e, hafoin fó sai rejultadu pozitivu iha loron sesta (30/04).
Tanba ne'e husu ba funsionária sira GMN nia, atu hakmatek hodi kumpri regra sira ne'e hotu, atu nune'e bele isin di'ak filafali, hala'o fali kna'ar hanesan baibain.
“Ita-boot sira servisu iha liña frente, la tauk no kuidadu-an maibé ikus mai imi mós hetan moras ida ne'e”, dehan Ministru Francisco, iha edifísiu Timor-Post Bebora, segunda(03/05).
Ho ida ne’e, husu ba jornalista sira ne'ebé iha liña frente, atu kuidadu-an nafatin bainhira hala'o kna'ar, tanba iha situasaun ida hanesan ne'e povu presiza tebes informasaun husi jornalista nune'e kuidadu-an no saudável nafatin. (*)
