Tempotimor (Dili)-Ministra Saúde (MS), Odete Maria Freitas Belo konsidera vasina AstraZeneca sai nu'udár prevensaun ikus hasoru surtu covid-19 iha Timor-Leste (TL).
“Hakarak deklara katak esforsu ba lala'ok prevensaun seidauk remata, tanba ita sei iha bala ikus, ita sei iha kilat musan ida ikus mak, vasina no vasinasaun”, afirms Odete iha salaun VIP, Aeroportu Internasionál Prezidente Nicolau Lobato, kuarta (05/05).
Vasina AstraZeneca ne'e realiza dadauk hela, tanba TL simu tiha ona husi covax facility nian, no iha faze daruak ne'e, simu tan vasina ho doses hamutuk rihun 20 (20 mil) ba moras infesioza águda, hanaran covid-19.
“Ida ne'ebé mak hakarak atu fó ba iha ita-nia ema rihun-20 ne'ebé mak elizidu ba maluk sira ho tinan 60 liu, nomós ba sira ne'ebé ho moras krónika sira hanesan, ema sira ne'ebé moras ho hipertensaun, moras diabétikus, ho sira ne'ebé mak ho moras rins, ne'ebé hala'o hela iha modeliza, moras infesioza krónika pulmaun nian, hanesan tuberkuloze, ita sura ho maluk sira ne'ebé moras hela ho HIVSIDA”, dehan nia.
Sidadaun sira afetadu ho moras hirak ne'e, hanaran grupu vulnerável ka grupu risku ne'ebé iha posibilidade ka, probalididade aas, atubele ospitaliza no lakon sira-nia vida bainhira virus SARS-CROV2 atubele hada'et ba sira.
Tanba ne'e, husu ba sidadaun hotu atu konvense malu no ema iha ida-idak konsiénsia hodi simu vasina AstraZeneca, nune'e bele halo redusaun ba moras pandemia globál surtu covid-19 iha TL.
Embaixadór Austrália iha TL, Peter Roberts hato’o nia kongratulasau ba governu TL, liuhusi ministériu saúde ne'ebé fornese ona vasina astraZeneca iha faze dahuluk nian ho susesu ba pasiénte sira.
“Vasina ne'e ho montante doses rihun 20 to'o ohin, no iha semana rua mai sei to’o tan doses rihun 10. Apoiu ida ne'e hanesan komitmentu husi governu Austrália hodi tulun kobertura vasina ba populasaun ho pursentu 80 (80%) ne'ebé la kobre husi covax”, dehan Peter Roberts.
Vasina AstraZeneca ne'e, produz iha sidade Melbourne no sidadaun sira iha Austrália, maioria mak simu ona vasina refere. (*)
