Tanba ne’e husu ba komunidade sira ne’ebé hakarak moris presiza koopera no tenke sakrifika hodi tuir teste swab, tanba desizaun ne’ebé governu foti di’ak ba sidadaun hotu.

Xefe Governu halo teste swab tanba iha loron sesta (07/05) sei aranka ba Balibo, Munisípiu Bobonaro hodi inaugura Postu seguransa UPF Fronteira iha We-Fauk.

Konstrusaun ba postu UPF ne’e hetan apoiu hosi Governu Austrália no servisu hamutuk ho Governu Timor-Leste.

“Ha’u hanoin ne’e ba ita hotu nia di’ak, ha’u hanoin ita tenke koopera, ha’u  halo swab test ne’e dala haat ona, aban atu ba Balibo sira dehan, Primeiru Ministru atu ba kondisaun tenke swab, ha’u dehan ha’u siap, prontu atu swab”, dehan Taur liuhusi komunikadu imprensa ne'ebé www.tempotimor.com asesu, kinta (06/05).

Maski, dúvida ho komunidade balun ne'ebé rezeita teste swab, enkuantu governu foti desizaun hala’o swab ba povu tanba hanoin di’ak ba povu.

“Tanba-sa mak sidadaun sira lakoi koopera ne’e ba ita-nia moris ne’e, sei ita hakarak moris tenke sakrifisiu, ne’ebé ha’u husu inan-aman sira, Governu la’ós bulak atu halo at ba ita-nia sidadaun sira, buat ne’e di’ak e lakoi sidadaun sira mate, tanba dadaun ne’e ita mate na’in-haat ona”, dehan Taur. (*)