Rezolusaun governu ne’ebé aprova iha loron 19 fulan-maiu tinan 2021, define objetivu sira ba kampaña vasinasaun nian no orientasaun hodi asegura husi medida preventiva sira iha vigór ba surtu Covid-19.

“Tenke kumpri rejime prezensial ne'ebé hetan ordén, bainhira atu ba servisu, sira hotu tenke hetan vasina. Ho forma seluk dehan, sira tenke vasina, rekezitu ida mak, antes filafali ba servisu tenke hetan vasina. Só hirak ne'ebé vasina tiha, vasina inzesaun dahuluk ou inzesaun kompletu, só sira ne'e de'it mak bele filafali ba servisu”, dehan Ministru Prezidénsia Konsellu Ministru (MPKM), Fidélis Leite Magalhăes iha Ministériu Finansas, Ai-tarak Laran, kuarta (19/05).

Tanba ne’e, husu ba funsionáriu públiku sira hotu iha rai laran, atu sai ezemplu ba sidadaun sira seluk, hodi desmistifika (haluha) tiha tauk sira ne'ebé laiha fundamentu kona-ba vasina sira.

“Sira ne'ebé mak servidór públiku sira, servisu hanesan funsionáriu sira, iha dever atu hatudu ezemplu. Tanba ne'e mak governu halo rekezitu ida katak, antes bele ba marka prezensa iha administrasaun públika, ou servisu filafali ho normál, funsionáriu sira tenke hetan vasina”, afimra nia. (*)