Médiku Sentru Saúde Komoro (SSK), Veronica Vilanova dos Santos hatete, dadauk populasaun hamutuk 8.265 simu ona vasina AstraZeneca ba faze daruak nian iha Sentru Saúde Komoro.
Ho ida ne'e, totál ema ne’ebé simu vasina, involve mós ema sira ne'ebé mak moras, no idade 60 ba leten, hafoin ho ema sira ne'ebé mak la moras no instituisaun sira ne’ebé servisu iha liña frente.
"Vasina AstraZeneca ida faze segundu ninian ne'e iha 10 maiu to'o horseik (19/05), ami husi sentru saúde komoro, ema 8.265 mak simu ona”, informa nia ba www.tempotimor.com iha sentru saúde Komoro, kinta (20/05).
Maibé, husi totál hirak ne'e seidauk konta ho atividade vasinasaun loron 20 maiu nian, tanba agora de'it populasaun sira kontinua mai barak atu vasina.
Vasina AstraZeneca ba segundu faze ne'ebé ekipa médiku sira fahe ba kada aldeia, ida ne'e sei la taka dalan mós ba ema hotu husi instituisaun iha liña frente sira ne'e, instituisaun Polísia sira, profesór sira, atubele vasina hotu.
"Agora iha ne'e ami tama tiha ona ba Suku Fatuhada, Komoro, Bebonuk ho Madohi ne'e ami vasina ona”, hatete nia. (*)
