Iha serimónia entrega sentru saúde ne’e, hala’o iha loron 21 fulan-maiu tinan 2021, direije husi Embaixadór EUA, Kevin Blackstone akompaña husi Ministra Saúde (MS), Odete Maria Freitas Belo.
Embaxadór EUA iha Timor-Leste, Charles Kevin Blackstone hatete, obra ba renovasaun klinika Kada Bunak ne'e nu'udar rekoñesimentu husi kontraktór timoroan sira.
“Fatin kada Bunak, fatin ida ne’ebé pontu alto Dili nian ne’ebé furak, atu fó rekoñesimentu ba obra di’ak renovasaun klinika, ne’ebé hala’o husi kontraktór timoroan nian ho finansiamentu husi forsas estadus unidos amerika nian liuhosi enjiñariu forsa naval nian”, dehan nia ba jornalista iha Namalai-Dili, sesta (21/05)
Reablitasaun ba klinika Kada Bunak ne'e governu EUA aloka fundu husi forsa naval Amerika nian ho montante osan rihun US$152,839.
Iha fatin hanesan Ministra Saude, Odete Maria Freitas Belo, agradese ba governu Amerika nia apoiu bele reablitasaun postu klinika refere hodi fó asisténsia saúde ba komunidade sira.
“Ha’u lori governu nia naran hakarak hato'o agradese ba governu Amerika ba nia apoiu hodi hadi’a postu saúde ida ne'e”, afirma nia.
Entretantu xefe aldeia Namalai, Fernando Maia, kontente tebes ho klinika foun ne'e tanba bele fasilita di'ak liután komunidade sira hodi ba asesu sentru saúde no agradese tebes mós ba governu amerikanu no Timor-Leste.
Klinika Kada Bunak ne'e kompleta ho fasilidade saúde balun no kuartu atendementu haat, hanesan sala farmásia, sala konsulta maternidade ida, sala konsulta jerál no sala laboratóriu. (*)
