“Sim ami ko’alia tanba situasaun pandemia covid-19, atendimentu Ministériu Saúde nian ba ema ho defisiénsia sira, ita-boot sira hatene katak ami iha na’in-7 e na’in-8 ne'ebe mak afeta pozitivu covid-19 maibé saúde nia atendimentu ne'e lentu no deskriminativu”, hatete Gaspá iha Parlamentu Nasional, kuarta (21/07).

Ho preokupasaun ne'e, iha loron kuarta (21/7), Asosiasaun Halibur Defisiensia Matan Timor-Leste deside hasoru malu ho Prezidente Parlamentu Nasionál (PN), Aniceto Longuinhos Guteres Lopes hodi hato'o preokupasaun hirak ne'e.

“Ami mai hato'o ami-nia lamentasaun no preokupasaun sira ne'e ba prezidente Parlamentu Nasionál, hanesan reprezentante povu e segundu orgaun estadu iha rai ida ne'e, atu fó hanoin no rekomendasaun ba Ministériu saúde no Primeiru Ministru atu orienta ba Saúde no Sentru Intergradu no Jestaun ba Krize (SIJK) atu haree situasaun ne'e”, dehan nia.

Tanba haree ba pozisaun governu nian katak moras ne'e perigu no sei daet lalais ba ema hotu, entaun atendimentu ne'e mós tenke rápidu no hanesan, maibé labele halo diskriminativu.

“Deskriminativu mak ne'e, ami-nia ema teste restreu hetan rezultadu pozitivu covid-19, maibé la fó atendimentu ida ne'ebé igual”, hatete nia.

Pozisaun AHDMTL ko’alia bazeia ba faktu no dadus, no la ko’alia buat arbiru, tanba realidade hasoru ne'e mak koalia, tanba se  iha Dili de'it, Ministériu Saúde halo tiha ona hanesan ne'e, satán ema defisiénsia sira iha área rurál.

Ba kestaun ne'e, Prezidente Parlamentu Nasional (PN), Aniceto Longuinhos Guteres Lopes rekoiñese kestaun ne'e no sei haruka karta ofisiál ba Primeiru Ministru (PM), Taur Matan Ruak no Ministra Saúde (MS) inklui sei hato'o mós ba reuniaun Konsellu Estadu.

Enkuantu, pasiénte Covid-19 na'in-7 nu’udar defisiénsia matan ne'ebé dadauk asegura hela edifisiu Asosiasaun Halibur Defisiensia Matan Timor-Leste (AHDMTL) iha Manleuana. (*)